तरुणीचा अंघोळ करताना व्हिडीओ बनवला अन् ब्लॅकमेल... नंतर, मुलीच्या वडिलांनी घेतला 'असा' बदला!

अश्लील व्हिडीओ बनवून ब्लॅकमेल...

आग्रा येथील मलपुरा परिसरात राहणारा एक 17 वर्षीय मुलगा लग्न समारंभामध्ये व्हिडीओ बनवण्याचं म्हणजेच व्हिडीओग्राफर म्हणून काम करत होता. यादरम्यान, एका 16 वर्षीय मुलीकडे त्या मुलाचं लक्ष गेलं. संधी साधून त्या मुलाने पीडित मुलीचा अंघोळ करताना व्हिडीओ बनवला आणि त्याने तिला ब्लॅकमेल करण्यास सुरूवात केली. तो अश्लील व्हिडीओ दाखवून आरोपीने मुलीकडे 50 हजार रुपयांची मागणी केली. 

पीडितेने सगळं वडिलांना सांगितलं

या घटनेमुळे पीडिता अतिशय घाबरली आणि तिने ही सर्व बाब आपल्या वडिलांना सांगितली. पण, आरोपी तरुण काहीही केल्यास ऐकायला तयार नव्हता. तो सतत पीडितेला तिचा अश्लील व्हिडीओ दाखवून त्रास देत होता. 

हे ही वाचा: पतीच्या मोबाईलमध्ये पाहिले 'ते' चॅट्स, पत्नी प्रचंड संतापली अन् जाब विचारताच घडली भयानक घटना...

18 फेब्रुवारी 2024 रोजी आरोपी तरुण त्याच्या कामासाठी एका लग्नात गेला आणि तिथून तो अचानक बेपत्ता झाला. त्यावेळी, सैंया पोलीस स्टेशन हद्दीत त्याचा अर्धवट जळालेला मृतदेह सापडला. परंतु, त्याची ओळख पटत नसल्यामुळे प्रकरणाच्या तपासात अडथळा येत होता. 

'असा' रचला हत्येचा कट 

पोलिसांनी कॉल डिटेल्स तपासले असता 18 फेब्रुवारी रोजी मृत तरुण आणि आरोपी वडिलांचं लोकेशन खारी नदीच्या जवळ या एकाच ठिकाणी आढळलं. त्यानंतर, मृतदेहाची डीएनए टेस्ट करण्यात आली. रिपोर्ट्सवरून, तो अर्धवट जळालेला मृतदेह त्याच तरुणाचं असल्याचं पोलिसांना कळालं. पुढे पोलिसांच्या तपासादरम्यान, पीडितेच्या वडिलांनी फेसबुक चॅटच्या माध्यमातून तरुणाला आपल्या दुकानावर बोलवलं असल्याचं समोर आलं. तिथे आरोपीने आधी मफलर आणि तारच्या साहाय्याने तरुणाचा गळा दाबला आणि नंतर मृतदेह ड्रममध्ये भरून शेतात घेऊन गेला. त्यानंतर, आरोपीने तो मृतदेह जाळून टाकण्याचा प्रयत्न केला. आपल्याविरोधातील पुरावे मिटवण्यासाठी आरोपीने खूपच हुशारीने हा कट रचला होता.

हे ही वाचा: 'त्या' कारणावरून कुटुंबियांमध्ये वाद! सुनेनं जेवणात विष मिसळलं अन्... नेमकं काय घडलं?

अखेर, पोलिसांनी पीडितेच्या वडिलांना अटक केली आणि आरोपीने चौकशीदरम्यान आपला गुन्हा कबूल केला. आपल्या मुलीची इज्जत वाचवण्यासाठी संबंधित तरुणाच्या हत्येचा कट रचला असल्याचं आरोपीने पोलिसांना सांगितलं. खरंतर, आरोपी हत्येनंतर आफ्रिकेला जाण्याच्या सुद्धा तयारीत असल्याचं समोर आलं. सध्या, प्रकरणाचा तपास सुरू असल्याचं सांगितलं जात आहे.