भाजप आमदाराच्या गाडीवर जीवघेणा हल्ला, कट रचल्याचा आरोप, तीन पोलीस निलंबित; नेमकं काय घडलं?

या घटनेनंतर आमदार राजीव तरारा यांनी अत्यंत गंभीर आरोप करत हा हल्ला म्हणजे कोणताही अपघात नसून एक सुनियोजित षडयंत्र असल्याचे म्हटले आहे. त्यांनी असा दावा केला की, त्यांच्या जिवाला धोका निर्माण करण्यासाठीच हा कट रचला गेला होता. विशेष म्हणजे, आरोपींना पोलीस कोठडीत असताना त्यांचे व्हिडिओ बनवून या प्रकरणाला मुद्दाम जातीय रंग देण्याचा प्रयत्न केला जात असल्याचा आरोपही त्यांनी केला आहे. समाजात तेढ निर्माण करून वातावरण खराब करण्याच्या उद्देशाने काही शक्ती यामागे सक्रिय असल्याचे आमदारांचे म्हणणे आहे. या संवेदनशील घटनेची माहिती तातडीने देऊनही पोलीस घटनास्थळी पोहोचायला तब्बल 30 ते 35 मिनिटे उशीर झाल्याने, या प्रकरणातील पोलीस प्रशासनाच्या भूमिकेवरही त्यांनी तीव्र संताप व्यक्त केला आहे.

हेही वाचा : पुणे : बिल्डरच्या फसवणुकीमुळे सेवानिवृत्त अधिकारी नैराश्यात, सातव्या मजल्यावरून उडी मारून संपवलं जीवन

आमदारांच्या तक्रारीची आणि सुरक्षेतील त्रुटींची गंभीर दखल घेत अमरोहाचे वरिष्ठ पोलीस अधीक्षक (एसएसपी) यांनी मोठी कारवाई केली आहे. कर्तव्यात कसूर केल्याचा आणि माहिती मिळूनही उशिरा पोहोचल्याचा ठपका ठेवत एसएसआय सतीश कुमार, कस्बा इंचार्ज जुगल किशोर आणि आरक्षी अंशुल कुमार या तीन पोलीस कर्मचाऱ्यांना तात्काळ निलंबित करण्यात आले आहे. पोलिसांच्या मते, रोहित आणि प्रदीप या दोन मुख्य आरोपींना अटक करण्यात आली असून, या प्रकरणाशी संबंधित इतर फरार संशयितांचा शोध घेण्यासाठी पथके रवाना करण्यात आली आहेत. मात्र, दुसरीकडे सोशल मीडियावर एक व्हिडिओ व्हायरल झाला असून, त्यात आरोपी रोहितने असा दावा केला आहे की, त्याची दुचाकी आमदारांच्या गाडीला धडकली नव्हती, तरीही त्याला बेदम मारहाण करण्यात आली, ज्यामध्ये त्याचा हात मोडला आहे.

सध्या अमरोहामध्ये या घटनेमुळे तणावपूर्ण शांतता असून, राजकीय वर्तुळात याचे तीव्र पडसाद उमटत आहेत. एकीकडे सत्ताधारी पक्षाच्या आमदारावर झालेला हल्ला ही चिंतेची बाब ठरत असताना, दुसरीकडे आरोपींनी केलेले दावे आणि पोलिसांवर झालेली कारवाई यामुळे या प्रकरणाला वेगळे वळण मिळाले आहे. पोलीस आता या प्रकरणाची सखोल चौकशी करत असून, हा खरोखरच एखादा राजकीय कट होता की रस्त्यावरील वादातून उद्भवलेली हिंसा, याचा शोध घेण्याचा प्रयत्न सुरू आहे. या घटनेने स्थानिक पोलिसांच्या कार्यप्रणालीवर प्रश्नचिन्ह उपस्थित केले असून, आगामी काळात या प्रकरणावरून उत्तर प्रदेशातील राजकारण अधिक तापण्याची चिन्हे दिसत आहेत.

इतर महत्त्वाच्या बातम्या 

पुणे : बिल्डरच्या फसवणुकीमुळे सेवानिवृत्त अधिकारी नैराश्यात, सातव्या मजल्यावरून उडी मारून संपवलं जीवन