चोरीचा खोटा आरोप आणि अपमानास्पद वागणूक

पोलीस तपासात मिळालेल्या सुसाईड नोटनुसार, सदर विद्यार्थिनीवर शाळेत 20 आणि 10 रुपये चोरी केल्याचा खोटा आरोप करण्यात आला होता, ज्यामुळे ती प्रचंड दुखावली गेली होती. शाळेतील शिक्षकांनी तिला यावरून खूप ओरडले आणि अपमानास्पद वागणूक दिली, जी ती सहन करू शकली नाही. या मानसिक छळामुळे आता आपल्याला जगण्याचा कोणताही अधिकार नाही, अशी भावना तिने चिठ्ठीत व्यक्त केली आहे. तिने आपल्या आई, भावंडे आणि इतर कुटुंबीयांची वारंवार माफी मागितली असून, या मृत्यूसाठी तिच्या आईला जबाबदार धरू नये आणि हा निर्णय तिने स्वतःच्या इच्छेने घेतला असल्याचे चिठ्ठीत नमूद केले आहे.

हे ही वाचा : मिसिंग लिंक : पहाटे तीनची वेळ, समोर कोसळती दरड अन् SOSचं बटण, तरुणांच्या प्रसंगावधानाची चर्चा

तो शिक्षक कोण?

दुसरीकडे, मृत विद्यार्थिनीच्या कुटुंबीयांनी आरोप केला आहे की, शाळेतील शिक्षकांच्या सततच्या जाचामुळे आणि ओरडण्यामुळेच त्यांच्या मुलीने हे टोकाचे पाऊल उचलले. मुलीच्या आईने प्रसारमाध्यमांशी बोलताना सांगितले की, घरात तिच्यावर कोणताही दबाव किंवा त्रास नव्हता. तिला फक्त इतकेच समजले होते की, शाळेत शिक्षकांकडून तिच्या मुलीला त्रास दिला जात होता, मात्र नेमक्या कोणत्या शिक्षकाने हे केले, याबाबत तिला सविस्तर माहिती नाही.

हे ही वाचा : आईने प्रियकरासोबत केला कायदेशीर करार, मुलाने उचललं टोकाचं पाऊल, काय घडलं?

सुसाईड नोटची सत्यता

घटनेच्या वेळी मुलीची आई त्वचेच्या आजारावर उपचार घेण्यासाठी रुग्णालयात दाखल होती आणि नातेवाईकांनी फोनवरून माहिती दिल्यानंतर तिला या घटनेची माहिती मिळाली. पोलीस प्रशासनाने दिलेल्या माहितीनुसार, मुलीच्या हाताने लिहिलेल्या सुसाईड नोटची सत्यता पडताळून पाहिली जात आहे. तसेच, शाळेत शिक्षकांनी तिला खरंच ओरडले होते का आणि कोणत्या परिस्थितीमुळे तिने आत्महत्या केली, या संदर्भात कुटुंबीयांच्या आरोपांचा आधार घेऊन पोलीस सर्व बाजूंनी सखोल तपास करत आहेत.