मिसिंग लिंक : पहाटे तीनची वेळ, समोर कोसळती दरड अन् SOSचं बटण, तरुणांच्या प्रसंगावधानाची चर्चा

missing link tunnel landslide : मिसिंग लिंक प्रकल्पातील दरड कोसळण्याच्या घटनेनंतर त्या ठिकाणी उपस्थित असलेल्या तीन तरुणांच्या प्रसंगावधानामुळे संभाव्य मोठी दुर्घटना टळल्याचे बोलले जात आहे. संदेश खरात, रोशन सरगर आणि अक्षय लांडगे हे तिघे सांगलीचे असून सध्या नवी मुंबईतील नेरूळ येथे वास्तव्यास आहेत. सांगलीहून मुंबईकडे येत असताना पहाटे सुमारे तीनच्या सुमारास ते मिसिंग लिंक बोगद्यात पोहोचले. बोगद्याच्या शेवटच्या टप्प्याजवळ पोहोचताच वरून पाणी आणि लहान दगड पडताना दिसू लागले. पुढे जाणे धोकादायक वाटल्याने त्यांनी गाडी थांबवली. काही वेळातच मोठा दगड आणि मातीचा ढिगारा रस्त्यावर कोसळल्याने संपूर्ण मार्ग बंद झाला. सुरुवातीला नेमके काय घडत आहे हे समजत नसल्याने बोगदाच कोसळत असल्याची भीती त्यांच्या मनात निर्माण झाली होती.