महाराष्ट्र हादरला, 7 वर्षांनी लहान असलेल्या अंकेशला घरी बोलवायची, पण शेवटी विवाहित प्रियंका जीव गमावून बसली

नात्यातील दुरावा आणि हत्येचा थरार

पोलिसांनी दिलेल्या माहितीनुसार, या प्रकरणातील आरोपीची ओळख अंकेश योगेश बहिरवार (वय २२ वर्षे), रा. सोनापूर, तहसील सावली अशी पटली आहे. तर मयत महिला प्रियांका (वय २९ वर्षे), ही तुकुम येथील रहिवासी होती. प्रियांका ही आपल्या पतीपासून विभक्त राहत होती आणि याच काळात तिची भेट स्वतःपेक्षा ७ वर्षांनी लहान असलेल्या अंकेशशी झाली होती. हळूहळू या ओळखीचे रूपांतर प्रेमात झाले आणि ते दोघेही दुर्गापूर येथील प्रियांकाच्या घराच्या वरच्या मजल्यावर लिव्ह-इन रिलेशनशिपमध्ये राहू लागले. सुरुवातीला सर्व काही सुरळीत चालले होते, मात्र गेल्या काही काळापासून त्यांच्यात किरकोळ कारणांवरून वारंवार वाद होऊ लागले होते. प्रियांका अंकेशवर काही गोष्टींसाठी दबाव टाकत असे आणि त्याला त्याच्या कुटुंबाशी संवाद साधण्यापासून रोखत होती, ज्यातून त्यांच्यातील तणाव वाढत गेला आणि अखेर त्याचे रूपांतर हत्येत झाले.

 शवविच्छेदन अहवालाने उघडले हत्येचे गुपित

या हत्येचा भीषण घटनाक्रम १४ मार्चच्या रात्री सुरू झाला, जेव्हा अंकेशने वादाच्या भरात प्रियांकाचा काटा काढण्याचे ठरवले. त्याने संतापाच्या भरात घरातील मोबाईल चार्जरच्या वायरचा वापर करून तिचा गळा आवळला आणि तिचा मृत्यू झाल्याची खात्री केली. त्यानंतर घाबरलेल्या अंकेशने मध्यरात्री प्रियांकाच्या वडिलांना फोन केला आणि सांगितले की प्रियांका काही बोलत नाहीये, ती अचानक बेशुद्ध झाली आहे आणि कदाचित तिने आत्महत्या केली असावी. वडिलांनी आणि कुटुंबीयांनी तातडीने वरच्या मजल्यावर धाव घेतली असता त्यांना प्रियांका निपचित पडलेली दिसली. तिला तातडीने रुग्णालयात नेण्यात आले, परंतु डॉक्टरांनी तिला मृत घोषित केले. सुरुवातीला गळ्यावरील व्रण पाहून हा आत्महत्येचा प्रकार वाटत होता, त्यामुळे पोलिसांनी देखील अपघाती मृत्यूची प्राथमिक नोंद केली होती, मात्र सत्याचा उलगडा होणे बाकी होते.

गुरुवारी जेव्हा प्रियांकाचा शवविच्छेदन अहवाल पोलिसांच्या हाती आला, तेव्हा हत्येचे भीषण सत्य सर्वांसमोर आले. या अहवालात प्रियांकाचा मृत्यू गळा आवळल्यामुळे (Strangulation) झाला असल्याचे स्पष्ट नमूद करण्यात आले होते, ज्यामुळे अंकेशचा आत्महत्येचा बनाव पूर्णपणे उघड पडला. पोलिसांनी त्वरित अंकेशला ताब्यात घेतले आणि पोलिसी खाक्या दाखवताच त्याने आपला गुन्हा कबूल केला. दुर्गापूर पोलिसांनी वरिष्ठ अधिकाऱ्यांच्या मार्गदर्शनाखाली या प्रकरणाचा सखोल तपास करून घटनास्थळावरून हत्येसाठी वापरलेली मोबाईल चार्जरची वायर आणि एक्सटेंशन बोर्ड जप्त केले आहे. आरोपीविरुद्ध हत्येचा गुन्हा दाखल करण्यात आला असून, पोलीस अधिक तपास करत आहेत. २० दिवसांनंतर मिळालेल्या या निकालाने मयत प्रियांकाच्या कुटुंबाला मोठा धक्का बसला असून गुन्हेगाराला कठोर शिक्षा व्हावी, अशी मागणी आता जोर धरत आहे.