बर्थडे पार्टी सेलिब्रेट करण्यासाठी गेलेल्या व्यापाऱ्याची हत्या, डिलीव्हरी बॉयने डोक्यात हेल्मेट घालून संपवलं

पूर्व दिल्लीतील लक्ष्मी नगर परिसरात राहणारा शिवम गुप्ता हा व्यावसायिक 2 जानेवारीच्या संध्याकाळी आपल्या एका मित्रासोबत कनॉट प्लेस येथे पार्टीसाठी गेला होता. पार्टीदरम्यान राजीव चौक मेट्रो स्थानकाजवळ काही डिलिव्हरी बॉयसोबत त्याचा वाद झाला. सुरुवातीला किरकोळ असलेला हा वाद काही क्षणांतच हिंसक झाला. प्रत्यक्षदर्शींच्या माहितीनुसार, तीन तरुणांनी मिळून शिवमवर हल्ला केला आणि हेल्मेटने त्याच्या मारहाण केली. 

3 जानेवारीच्या पहाटे सुमारे 1.30 वाजता दिल्ली पोलिसांना पीसीआर कॉल आला. रस्त्याच्या कडेला एक तरुण रक्ताच्या थारोळ्यात बेशुद्ध अवस्थेत पडल्याची माहिती मिळाली. पोलिसांनी तातडीने घटनास्थळी धाव घेत शिवमला जवळच्या रुग्णालयात दाखल केले. डॉक्टरांनी तपासणी केल्यानंतर त्याच्या डोक्याला गंभीर दुखापत  असल्याचे निदर्शनास आले. शिवमची प्रकृती अत्यंत गंभीर असल्याने तो जबाब देण्याच्या स्थितीत नव्हता.

दरम्यान, शिवम घरी परतला नसल्याने कुटुंबीयांनी त्याच्याशी संपर्क साधण्याचा प्रयत्न केला. मात्र फोन लागत नसल्याने कुटुंबीय चिंतेत होते. काही वेळाने पोलिसांचा फोन आला आणि शिवम रुग्णालयात दाखल असल्याची माहिती कुटुंबीयांना देण्यात आली. डॉक्टरांच्या सल्ल्यानुसार 4 जानेवारी रोजी शिवमला राम मनोहर लोहिया रुग्णालयात हलवण्यात आले. 5 जानेवारी रोजी त्याच्यावर शस्त्रक्रिया करण्यात आली. डॉक्टरांनी पुढील 36 ते 72 तास अत्यंत महत्त्वाचे असल्याचे कुटुंबीयांना सांगितले होते. काही काळ प्रकृतीत सुधारणा दिसून आली आणि कुटुंबीयांना आशा वाटू लागली, मात्र 19 जानेवारी रोजी शिवमचा मृत्यू झाला.

पोलिसांनी घटनास्थळावरून रक्ताने माखलेले पुरावे गोळा केले असून परिसराची व्हिडीओग्राफी करण्यात आली आहे. तसेच आसपासच्या सीसीटीव्ही कॅमेऱ्यांच्या फुटेजची तपासणी सुरू आहे. प्राथमिक तपासात भारतीय न्याय संहितेच्या कलम 110 आणि कलम ३(५) अंतर्गत गुन्हा दाखल करण्यात आला आहे. तपास पुढे जात असताना आणखी कलमे वाढवली जाऊ शकतात, असे पोलिसांनी स्पष्ट केले आहे. आतापर्यंत दोन आरोपींना अटक करण्यात आली असून इतर संशयितांची भूमिका तपासली जात आहे.

दरम्यान, शिवमच्या कुटुंबीयांनी आरोपींवर कठोर कारवाई करण्याची मागणी केली आहे. “हेल्मेटसारख्या वस्तूला शस्त्र बनवून आमच्या मुलाची हत्या करण्यात आली. अशा प्रकारची घटना पुन्हा कोणत्याही कुटुंबावर ओढवू नये, यासाठी दोषींना कठोर शिक्षा व्हावी,” अशी भावना कुटुंबीयांनी व्यक्त केली आहे. कनॉट प्लेससारख्या गजबजलेल्या परिसरात घडलेल्या या घटनेमुळे राजधानीतील रात्रीच्या सुरक्षेवर पुन्हा एकदा गंभीर प्रश्नचिन्ह उपस्थित झाले आहे.

इतर महत्त्वाच्या बातम्या 

इंस्टाग्रामवर पत्नीचा प्रियकरासोबत फोटो पाहिला अन् वाद टोकाला पोहचला... रात्री घराबाहेर बोलवून पतीलाच संपवलं!