'ही माझी औलाद आहे की नाही?' बापाच्या मनात संशयाचं भूत, 6 वर्षीय चिमुरड्याचा नदीत फेकून जीव घेतला

शाळेत प्रवेशाचा बहाणा आणि बेपत्ता होण्याचे रहस्य

घटनेच्या दिवशी म्हणजेच 15 मार्च रोजी मल्लिकार्जुनने आपल्या मुलाला, सिद्धार्थला, एका नवीन शाळेत प्रवेश मिळवून देण्याच्या बहाण्याने घरून बाहेर नेले होते. काही दिवसांनंतर तो एकटाच गावात परतला, मात्र सिद्धार्थ त्याच्यासोबत नव्हता. जेव्हा कुटुंबातील सदस्यांनी आणि पत्नीने सिद्धार्थबद्दल विचारणा केली, तेव्हा मल्लिकार्जुनने वेगवेगळी आणि विसंगत उत्तरे देऊन वेळ मारून नेली. 1 एप्रिल रोजी या प्रकरणाला मोठे वळण मिळाले, कारण त्या दिवशी सिद्धार्थचा वाढदिवस होता. मुलाचा वाढदिवस साजरा करण्यासाठी जेव्हा त्याच्या आईने आपल्या मुलाला पाहण्याचा हट्ट धरला, तेव्हा मल्लिकार्जुन गोंधळला. त्याच्या बोलण्यात पुन्हा एकदा विसंगती दिसून आल्याने कुटुंबीयांचा संशय बळावला. अखेर त्यांनी विजयपुरा ग्रामीण पोलीस ठाण्यात मुलगा बेपत्ता असल्याची तक्रार दाखल केली.

हत्येची कबुली आणि पोलिसांचा तपास

पोलीस तक्रार दाखल झाल्यानंतर मल्लिकार्जुनने पळून जाण्याचा प्रयत्न केला, ज्यामुळे पोलिसांचा संशय अधिकच दृढ झाला. पोलिसांनी तातडीने कारवाई करत त्याला ताब्यात घेतले आणि कसून चौकशी केली. चौकशीदरम्यान मल्लिकार्जुनने आपला गुन्हा कबूल केला. त्याने पोलिसांना सांगितले की, तो सिद्धार्थला महाराष्ट्रातील कराड येथे घेऊन गेला होता आणि तिथे त्याने सिद्धार्थला कृष्णा नदीत ढकलून दिले. मुलाच्या पितृत्वाबाबत असलेल्या संशयामुळे त्याने हे टोकाचे पाऊल उचलल्याचे मान्य केले. आरोपीच्या कबुली जबाबानंतर विजयपुरा पोलिसांनी तात्काळ महाराष्ट्र पोलिसांशी संपर्क साधला. तेव्हा असे समजले की, कराड जिल्ह्यात एका लहान मुलाचा मृतदेह नदीत सापडल्यानंतर तिथे आधीच 'अपघाती मृत्यू' म्हणून एका प्रकरणाची नोंद करण्यात आली होती.

कराड पोलिसांनी पुरवलेले फोटो आणि इतर पुराव्यांच्या आधारे, तो मृतदेह सिद्धार्थचाच असल्याची खात्री पटली आहे. ६ वर्षांच्या सिद्धार्थचा अशा प्रकारे अंत झाल्याचे समजताच परिसरात हळहळ व्यक्त केली जात आहे. सिद्धार्थचा फोटो आणि कराड पोलिसांनी दिलेली माहिती जुळल्यानंतर विजयपुरा ग्रामीण पोलिसांनी या प्रकरणाला हत्येच्या गुन्ह्यात रूपांतरित केले आहे. आरोपी मल्लिकार्जुन हरिकेरी याला पोलिसांनी अटक केली असून त्याच्यावर कायदेशीर कारवाई सुरू आहे. केवळ एका निराधार संशयापायी एका बापाने आपल्या मुलाचा अशा प्रकारे बळी घेतल्याने समाजमन सुन्न झाले आहे. सध्या पोलीस या प्रकरणाचा अधिक सखोल तपास करत असून आरोपीला कडक शिक्षा मिळावी यासाठी पुरावे गोळा करण्याचे काम सुरू आहे.

इतर महत्त्वाच्या बातम्या 

कोल्हापूर : उसाच्या शेतात सापडला व्यापाऱ्याचा मृतदेह, 25 लाखांच्या खंडणीसाठी केली निर्घृण हत्या