ज्या मुलीसोबत लग्न होणार, त्याच मुलीच्या शेजारणीला आवडायचा नवरदेव, लग्नाआधीच अ‍ॅसिड फेकलं

लग्नाची तयारी आणि प्रेमाचा ट्रायअँगल 

या प्रकरणातील तपशील अत्यंत धक्कादायक असून त्यामागे ईर्षेची भावना असल्याचे दिसून येते. पीडितेच्या कुटुंबीयांनी दिलेल्या माहितीनुसार, 19 एप्रिल रोजी घरासमोर वरात येणार होती आणि संपूर्ण कुटुंब लग्नाच्या तयारीत व्यस्त होते. याच दरम्यान शेजारी राहणारी एक तरुणी, जिचे या घराशी जुने आणि जवळचे संबंध होते, ती मेहंदी लावण्याच्या बहाण्याने पीडितेच्या घरी आली. या तरुणीवर कोणालाही संशय आला नाही कारण तिचे आणि तिच्या बहिणीचे या घरात सतत येणे-जाणे असायचे. मात्र, पीडितेजवळ पोहोचताच तिने अचानक पीडितेच्या चेहऱ्यावर अॅसिड फेकलं आणि तिथून पळ काढला. तपासात असे समोर आले आहे की, ज्या मुलाशी पीडितेचे लग्न ठरले होते, त्याच मुलाला आरोपी तरुणी देखील पसंत करत होती. या एकतर्फी प्रेमातून निर्माण झालेल्या रागापोटी तिने हे भयंकर पाऊल उचलल्याचे स्पष्ट झाले आहे.

गंभीर प्रकृती आणि पोलिसांची कारवाई

 घटनेची माहिती मिळताच दिल्ली पोलिसांनी तातडीने कारवाई करत आरोपी तरुणीला ताब्यात घेतले आहे. पोलिसांनी या प्रकरणाची सर्व बाजूंनी चौकशी सुरू केली असून, या गुन्ह्यामागचे सर्व दुवे तपासले जात आहेत. आरोपी तरुणीने यापूर्वीही अनेकदा पीडितेच्या घरी येऊन तिच्याशी मैत्रीचे नाटक केले होते, त्यामुळे तिच्या अशा कृत्याने सर्वांनाच धक्का बसला आहे. कुटुंबीयांच्या म्हणण्यानुसार, त्यांना कधीच वाटले नव्हते की शेजारी राहणारी आणि घरात वावरणारी मुलगी असे काही करेल. सध्या पोलीस सर्व पुराव्यांची तपासणी करत असून पुढील कायदेशीर प्रक्रिया पार पाडली जात आहे. या घटनेने परिसरात दहशतीचे वातावरण असून पीडितेच्या उपचारासाठी आणि न्यायासाठी तिचे कुटुंब प्रशासनाकडे विनवणी करत आहे. पीडित तरुणीची अवस्था पाहता, तिला भविष्यात अनेक शस्त्रक्रिया आणि मानसिक धक्क्याला सामोरे जावे लागण्याची शक्यता आहे.

इतर महत्त्वाच्या बातम्या 

अमरावती : 180 मुली, 350 व्हिडीओ असल्याचा दावा, सत्य काय? मोबाईलमधून कोणी डाऊनलोड केले व्हिडीओ?