'बाहेरवाली'साठी पतीने केली 'घरवाली'ची हत्या, ह्रदयविकाराचा बनाव कसा झाला उघड?

प्रेमविवाह आणि पतीचे अनैतिक संबंध

अल्पा आणि अर्जुन यांचा विवाह 26 September 2016 रोजी कुटुंबीयांच्या मर्जीविरोधात कोर्ट मॅरेजच्या माध्यमातून झाला होता. लहानपणीच त्यांची सोयरीक झाली होती, परंतु नंतर दोन्ही कुटुंबात वाद झाल्याने त्यांनी पळून जाऊन लग्न करण्याचा निर्णय घेतला होता. सुरुवातीला सर्व काही सुरळीत सुरू असताना, कालांतराने त्यांच्या संसारात वादाची ठिणगी पडली. अर्जुनचे दुसऱ्या एका महिलेसोबत अनैतिक संबंध असल्याचे अल्पाच्या निदर्शनास आले होते, ज्याला तिने कडाडून विरोध केला. अर्जुन त्या दुसऱ्या महिलेला घरातच ठेवण्याचा हट्ट धरत असे आणि या कारणावरून तो अल्पाला वारंवार मारहाण करत असे. पती घरखर्चासाठी पैसे देत नसल्याने अल्पा साड्यांचे काम करून आपल्या 2 मुलांचा सांभाळ करत होती, मात्र अर्जुनचा छळ दिवसेंदिवस वाढतच गेला. 

संशयास्पद मृत्यू आणि वडिलांचा खंबीर लढा

मृत्यूच्या काही दिवस आधी, म्हणजेच 8 March 2026 रोजी एका लग्न समारंभात अल्पाची भेट तिच्या भावांशी झाली होती, तेव्हा तिने रडत रडत आपली सर्व आपबिती सांगितली होती. पतीने तिला घरातून काढून टाकण्याची धमकी दिली असून तिला राहण्यासाठी दुसरी जागा नसल्याचे तिने बोलून दाखवले होते. या भेटीनंतर केवळ 11 दिवसांनी, 19 March 2026 रोजी अल्पाचा मृत्यू झाल्याची बातमी तिच्या माहेरी पोहोचली. सासरच्या मंडळींनी हा नैसर्गिक मृत्यू असल्याचे भासवले, पण अल्पाच्या वडिलांना आपल्या मुलीच्या शरीरावर आणि विशेषतः मानेवर जखमांच्या खुणा दिसल्याने त्यांनी अंत्यसंस्कार थांबवून पोलिसांकडे धाव घेतली.

वरतेज पोलिसांनी या तक्रारीची दखल घेत मृतदेह पोस्टमॉर्टमसाठी पाठवला, ज्यामध्ये अल्पाचा मृत्यू नैसर्गिक नसून गळा आवळल्यामुळे श्वास कोंडून झाल्याचे स्पष्ट झाले. या पुराव्यांच्या आधारे पोलिसांनी पती अर्जुन परमार याच्याविरुद्ध हत्येचा गुन्हा दाखल केला आणि काही तासांतच त्याला त्याच गावातून अटक केली. भावनगर ग्रामीणचे एएसपी घनश्याम गौतम यांनी सांगितले की, सुरुवातीला हा संशयास्पद मृत्यू वाटत असला तरी वैज्ञानिक पुराव्यांनी हत्येचे गुपित उघड केले आहे. सध्या आरोपीची सखोल चौकशी सुरू असून, लवकरच त्याला न्यायालयात हजर करून रिमांडवर घेतले जाईल. एका चुकीच्या निर्णयाने आणि अनैतिक संबंधांनी एका सुखी संसाराचा रक्तरंजित अंत झाला आहे. गुजरातमधील भावनगर जिल्ह्यातून ही धक्कादायक घटना समोर आली आहे. 

इतर महत्त्वाच्या बातम्या 

महाराष्ट्र हादरला! वर्दीमागचं रक्तरंजित रहस्य, मुलीनेच घडवून आणली पोलीस बापाची हत्या; प्रियकराने 3 वर्षांनी उघड केला कट