दोस्ताला मारहाण होत असलेली सहन होईना, वाचवायला गेला, जमावाने त्यालाही संपवलं; एकुलत्या एक मुलाचा करुण अंत

नेमकी घटना काय?

सोमवारी संध्याकाळी सुलेबैलू येथील सरकारी हायस्कूलमध्ये दहावीच्या विद्यार्थ्यांसाठी विशेष जादा तास आयोजित करण्यात आल्या होता. वर्गातील तास संपवून विद्यार्थी जेव्हा शाळेबाहेर पडले, तेव्हा दबा धरून बसलेल्या काही तरुणांनी तिथे गोंधळ घालण्यास सुरुवात केली. अचानक झालेल्या या हल्ल्यामुळे परिसरात खळबळ माजली. हल्लेखोरांनी सर्वात आधी गिरीश नावाच्या विद्यार्थ्याला लक्ष्य केले आणि त्याला बेदम मारहाण करण्यास सुरुवात केली. गिरीशला वाचवण्यासाठी कोणीही पुढे येत नसताना, त्याचा मित्र संकेत याने धैर्य दाखवत मध्ये पडण्याचा निर्णय घेतला.

मैत्री खातर पत्करले मरण

संकेत आणि गिरीश यांच्यात घट्ट मैत्री होती. आपल्या डोळ्यादेखत मित्राला मारहाण होत असल्याचे संकेतला सहन झाले नाही. तो निडरपणे गिरीशला वाचवण्यासाठी हल्लेखोरांच्या अंगावर धावून गेला. मात्र, संतापलेल्या जमावाने गिरीशला सोडून आपला मोर्चा संकेत कडे वळवला. हल्लेखोरांनी संकेतच्या छातीवर, पोटावर आणि चेहऱ्यावर भीषण वार केले. हा हल्ला इतका भयानक होता की संकेत जागीच रक्ताच्या थारोळ्यात कोसळला आणि बेशुद्ध झाला. परिस्थिती हाताबाहेर जात असल्याचे पाहून हल्लेखोर तिथून पसार झाले.

हेही वाचा : नागपूर: पोलीस कर्मचाऱ्याची अंबाझरी तलावात उडी मारून आत्महत्या! मुलांच्या कस्टडीवरून पत्नीसोबत वाद झाल्याने टोकाचं पाऊल...

रुग्णालयात नेण्यापूर्वीच प्राणज्योत मालवली

जखमी गिरीशने कसाबसा सावरत आपल्या कुटुंबीयांना आणि शेजाऱ्यांना या घटनेची माहिती दिली. स्थानिक लोक घटनास्थळी पोहोचेपर्यंत संकेतची प्रकृती अत्यंत चिंताजनक झाली होती. त्याला तातडीने जवळच्या खाजगी रुग्णालयात हलवण्यात आले, मात्र वाटेतच त्याची प्राणज्योत मालवली. डॉक्टरांनी त्याला 'मृत' घोषित केले. आपल्या एकुलत्या एक मुलाचा असा करुण अंत झाल्याचे समजताच संकेतच्या पालकांवर दुःखाचा डोंगर कोसळला आहे.

शहरात तणाव; पोलीस हायअलर्टवर

या घटनेनंतर शिवमोग्गा शहरात जातीय तणाव निर्माण झाला आहे. खबरदारीचा उपाय म्हणून मेगन जिल्हा रुग्णालय आणि सुलेबैलू परिसरात मोठ्या प्रमाणात पोलीस बंदोबस्त तैनात करण्यात आला आहे. तुंगा नगर पोलिसांनी या प्रकरणात वेगाने तपास चक्रे फिरवून दोन मुख्य आरोपींना अटक केली आहे. इतर आरोपींचा शोध घेण्यासाठी पोलिसांची पथके रवाना झाली आहेत.

राजकीय पडसाद

स्थानिक आमदार चन्नाबसप्पा यांनी रुग्णालयात जाऊन जखमी गिरीशची विचारपूस केली आणि मृत संकेतच्या कुटुंबाचे सांत्वन केले. यावेळी त्यांनी राज्य सरकार आणि पोलीस प्रशासनावर जोरदार टीका केली. "हिंदूंच्या सुरक्षेबाबत प्रशासन अपयशी ठरत आहे," असा आरोप करत त्यांनी या घटनेचा तीव्र निषेध केला. एका निष्पाप विद्यार्थ्याचा मैत्रीखातर गेलेला बळी पाहून संपूर्ण कर्नाटक हळहळत आहे. सध्या शहरात शांतता राखण्याचे आवाहन प्रशासनाकडून करण्यात आले आहे.

इतर महत्त्वाच्या बातम्या 

देवेंद्र फडणवीसांच्या बंगल्यावर भाजपची बैठक, राज्यसभेसाठी कोणाला उमेदवारी? विनोद तावडे अन् आठवलेंबाबत मोठा निर्णय?