प्रेमसंबंधातील वादातून सोसायटीत तरुणाची गोळ्या झाडून हत्या, तरुणीने दोन भावांसमोर झाडल्या गोळ्या

साहिल सिंघल असे या 39 वर्षीय मृत तरुणाचे नाव असून तो विवाहित होता. पोलिसांच्या प्राथमिक माहितीनुसार, साहिलचे गेल्या चार वर्षांपासून एका दुसऱ्या महिलेशी प्रेमसंबंध होते. होळीच्या निमित्ताने ही महिला आपल्या दोन भावांसह साहिलला भेटण्यासाठी सोसायटीत आली होती. धक्कादायक बाब म्हणजे, साहिलने स्वतःच या तिघांची एन्ट्री सोसायटीच्या गेटवर करून त्यांना आत बोलावले होते. होळीच्या शुभेच्छा देण्याच्या बहाण्याने झालेली ही भेट अखेर रक्ताळलेल्या संघर्षात संपेल, याची कल्पना कोणालाही नव्हती. साहिल आणि त्या महिलेच्या भावांमध्ये सुरुवातीला किरकोळ चर्चा झाली, मात्र काही वेळातच त्यांच्यातील संवाद वादात रूपांतरित झाला.

हेही वाचा : मुंबईची खबर: यंदाच्या सुट्ट्यांमध्ये कोकणात सहलीचा प्लॅन करताय? केवळ 7 तासांत कोकणात पोहोचाल; नवी रो-रो सेवा...

सोसायटीच्या आवारातच सुरू असलेला हा वाद इतका विकोपाला गेला की, रागाच्या भरात असलेल्या महिलेच्या एका भावाने जवळ असलेले पिस्तूल काढून साहिलवर थेट गोळ्या झाडल्या. गोळीबाराच्या आवाजाने परिसरात मोठी पळापळ झाली आणि होळी खेळणारे लोक जीव वाचवण्यासाठी सैरावैरा धावू लागले. रक्ताच्या थारोळ्यात पडलेल्या साहिलला तातडीने जवळच्या एका खाजगी रुग्णालयात दाखल करण्यात आले, मात्र रुग्णालयात पोहोचण्यापूर्वीच त्याचा मृत्यू झाला होता. डॉक्टरांनी त्याला मृत घोषित केल्यानंतर कुटुंबावर दुःखाचा डोंगर कोसळला आहे. अवघ्या काही मिनिटांतच होळीच्या रंगांचे रूपांतर रक्ताच्या थारोळ्यात झाल्याने उपस्थित नागरिक सुन्न झाले आहेत.

या घटनेची माहिती मिळताच सेक्टर-११३ पोलिसांनी तातडीने पावले उचलत घटनास्थळाचा पंचनामा केला आणि दोन आरोपींना ताब्यात घेतले आहे. मृताच्या नातेवाईकांनी दिलेल्या तक्रारीवरून पोलिसांनी गुन्हा दाखल केला असून पुढील कायदेशीर प्रक्रिया सुरू केली आहे. हा संपूर्ण प्रकार जुन्या वादातून किंवा अनैतिक संबंधांच्या गुंतागुंतीतून घडल्याचा पोलिसांचा प्राथमिक अंदाज आहे. पोलीस आता या प्रकरणातील सर्व पैलूंचा कसून तपास करत असून, हत्येसाठी वापरलेले शस्त्र आणि त्यामागचे नेमके कारण शोधण्याचा प्रयत्न करत आहेत. भरवस्तीत आणि सुरक्षा रक्षक असलेल्या सोसायटीत अशा प्रकारे हत्या झाल्याने रहिवाशांच्या सुरक्षिततेचा प्रश्नही पुन्हा एकदा ऐरणीवर आला आहे.

इतर महत्त्वाच्या बातम्या 

बारावीत शिकणाऱ्या पुतण्याने चुलतीच्या डोक्यात गोळी घातली अन् थेट पोलिस स्टेशन गाठले, कारण ऐकून पोलिसही हादरले