आधी आंतरजातीय विवाह, मग महिलेचे अनैतिक संबंध; प्रियकराच्या मदतीने पतीची हत्या

हेही वाचा : 'मेक इन इंडियाच्या नावाखाली हुकूमशाह...' उद्धव ठाकरेंची सडकून टीका, मोदींना काय म्हणाले?

दीपालीने पतीचं घर सोडलं पण वाद सुरुच राहिला 

अटक करण्यात आलेल्या महिलेचं नाव दीपाली उर्फ बाली विजय साळुंके असं आहे. तिचा पती गौरव रागडे हे नागपूरच्या अजनी परिसरातील 27 वर्षीय ऑटोरिक्षाचालक होते. पोलिसांच्या माहितीनुसार, गौरव यांना दीपालीचे ऋषिकेश खोडे यांच्यासोबत कथित संबंध असल्याची माहिती मिळाली होती. यावरून दोघांमध्ये वैवाहिक वाद सुरू झाला होता. घटनेच्या सुमारे आठ महिने आधी दीपाली आणि गौरव यांनी आंतरजातीय प्रेमविवाह केला होता. मात्र, त्यानंतर दीपालीने गौरव यांचं घर सोडलं आणि ती वेगळी राहू लागली होती.

हेही वाचा : 'मेक इन इंडियाच्या नावाखाली हुकूमशाह...' उद्धव ठाकरेंची सडकून टीका, मोदींना काय म्हणाले?

गौरव यांच्यावर चाकूने हल्ला

20 ऑगस्ट रोजी दुपारी गौरव यांनी आपल्या वडिलांना नरेंद्रनगर येथे दीपाली आणि ऋषिकेश यांच्यासोबतचा वाद मिटवण्यासाठी जात असल्याचं सांगितलं होतं. त्यावेळी ऋषिकेश हा दोन साथीदारांसोबत मद्यपान करत होता. सायंकाळी सुमारे 5 वाजता गौरव आणि या गँगमध्ये वाद झाला. गौरव यांच्या वडिलांच्या माहितीनुसार, दीपालीच्या सांगण्यावरून ऋषिकेश आणि त्याच्या साथीदारांनी नाल्यावरील पुलाजवळ गौरव यांच्यावर चाकूने हल्ला केला. या हल्ल्यात ते गंभीर जखमी झाले. त्यांना जवळच्या रुग्णालयात नेण्यात आलं. मात्र, डॉक्टरांनी त्यांना मृत घोषित केलं. या घटनेनंतर दीपाली ठाण्यातील डॉ. बाबासाहेब आंबेडकर रोड परिसरातून फरार झाली होती.

दरम्यान, ठाणे क्राइम ब्रँचच्या अँटी एक्स्टॉर्शन सेलने तिचा शोध घेतला आणि शनिवारी तिला अटक केली. ठाणे क्राइम ब्रँचचे वरिष्ठ पोलीस निरीक्षक शैलेश साळवी यांनी दिलेल्या माहितीनुसार, चौकशीदरम्यान दीपालीने गुन्ह्यातील तिची भूमिका मान्य केली. त्यानंतर तिला नागपूर पोलिसांच्या बेलतरोडी पोलिसांच्या ताब्यात देण्यात आलं. या प्रकरणातील इतर आरोपींबाबत ठाणे पोलिसांकडे सध्या कोणतीही माहिती नसल्याचं साळवी यांनी सांगितलं. पत्नीच्या कथित संबंधांवरून सुरू झालेला वाद, त्यानंतर झालेला हल्ला आणि फरार झालेल्या पत्नीला ठाण्यात अटक, या घडामोडींमुळे नागपूरमधील या हत्या प्रकरणाला आता वेगळं वळण मिळालं आहे.