प्लंबरने आधी वृद्ध दाम्पत्याने स्क्रू ड्रायव्हरने भोकसून संपवलं...नंतर मोलकरणीकडे गेला अन्

स्क्रू ड्रायव्हरने वृद्ध दाम्पत्यावर हल्ला 

पोलिसांनी दिलेल्या माहितीनुसार, के. एस. कपूर (80) आणि त्यांच्या पत्नी रजनी कपूर (76) यांच्या घरी राजकुमार मागील दोन वर्षांपासून प्लंबर म्हणून काम करत होता. मंगळवारी तो कपूर दाम्पत्याच्या घरी प्लंबिंगचे काम करण्यासाठी गेला होता. काम पूर्ण झाल्यानंतर 300 रुपयांच्या पैशांवरून राजकुमार आणि कपूर दाम्पत्यामध्ये वाद झाला. हा वाद वाढल्यानंतर राजकुमारने स्क्रू ड्रायव्हरने वृद्ध दाम्पत्यावर हल्ला केला. या हल्ल्यात दोघेही गंभीर जखमी झाले. ही घटना डेहराडून येथे घडली. 

हेही वाचा : MPSC आंदोलनाबाबत हायकोर्टातून मोठी अपडेट, न्यायालयाचं विद्यार्थ्यांना आवाहन, सरकारला निर्देश

दरम्यान, शेजारील घरात काम करणाऱ्या टिलिया देवी (55) यांना घरातून आरडाओरड ऐकू आली. त्यानंतर त्या घटनास्थळी धावून गेल्या. त्यावेळी आरोपीने त्यांच्यावरही हल्ला केला. बिहारमधील दरभंगा येथील रहिवासी असलेल्या टिलिया देवी यांनाही गंभीर दुखापत झाली. या हल्ल्यात कपूर दाम्पत्य आणि टिलिया देवी असे तिघेही गंभीर जखमी झाले. त्यांना उपचारासाठी रुग्णालयात नेण्यात आले. मात्र, डॉक्टरांनी तिघांनाही मृत घोषित केले. घटनेनंतर परिसरातील नागरिकांनी राजकुमारला पकडून पोलिसांच्या ताब्यात दिले.

पोलिसांनी राजकुमारच्या ताब्यातून गुन्ह्यात वापरलेला स्क्रू ड्रायव्हर आणि सोन्याची साखळी जप्त केली आहे. घटनेपूर्वी आरोपी कपूर दाम्पत्याच्या घराकडे जात असल्याचे सीसीटीव्ही फुटेजमध्ये दिसून आले आहे. पोलीस आणि न्यायवैद्यक पथकाने घटनास्थळी पोहोचून पुरावे गोळा केले. डेहराडूनचे एसएसपी यांच्यासह वरिष्ठ पोलीस अधिकाऱ्यांनीही घटनास्थळी भेट देऊन तपासाचा आढावा घेतला. कुटुंबीयांच्या तक्रारीवरून हत्येचा गुन्हा दाखल करण्यात आला आहे. राजकुमारची चौकशी करून हत्येपूर्वी नेमका काय घटनाक्रम घडला आणि तिहेरी हत्येमागील नेमकी परिस्थिती काय होती, याचा तपास पोलीस करत आहेत.