पुणे : इंजिनिअरने गरोदर पत्नीला गळा चिरुन संपवलं, अन् दुसऱ्या मजलीवरुन मारली उडी, कारण काय?

घटनेमागचे मुख्य कारण पती-पत्नीमधील जमिन खरेदीवरून होणारे वाद

या भयंकर घटनेमागचे मुख्य कारण पती-पत्नीमधील जमिनीच्या खरेदीवरून होणारे सततचे वाद असल्याचे निष्पन्न झाले आहे. आकाश हा मूळचा अहिल्यानगर जिल्ह्यातील वाघा गावचा रहिवासी आहे. साधारण पाच ते सहा महिन्यांपूर्वी आकाशने आपल्या मूळ गावी शेतजमीन खरेदी केली होती. मात्र, पत्नी शुभांगीचा या जमीन खरेदीला कडाडून विरोध होता. तिची अशी ठाम इच्छा होती की, त्यांनी गावात जमीन घेण्याऐवजी पुण्यातच एखादी मालमत्ता किंवा प्रॉपर्टी खरेदी करावी. याच एका मुद्द्यावरून या दोघांमध्ये गेल्या काही काळापासून सतत खटके उडत होते. शुभांगीच्या वडिलांनी पोलिसांत दिलेल्या तक्रारीनुसार, या मालमत्तेच्या वादातूनच त्यांच्यात वारंवार भांडणे होत असत. रविवारी पहाटेदेखील याच कारणावरून त्यांच्यात पुन्हा एकदा जोरदार वाद उफाळून आला. या वादाचे रूपांतर एका मोठ्या भांडणात झाले आणि रागाच्या भरात नियंत्रण सुटलेल्या आकाशने हे अत्यंत टोकाचे आणि भयंकर पाऊल उचलले, ज्यामुळे एका गरोदर महिलेचा अंत झाला.

 पत्नीचा धारदार शस्त्राने गळा चिरून खून 

घटनेची माहिती मिळताच पोलिसांनी तात्काळ घटनास्थळी धाव घेत तपास सुरू केला. एका वरिष्ठ पोलीस अधिकाऱ्याने दिलेल्या माहितीनुसार, पोलीस जेव्हा घटनास्थळी पोहोचले तेव्हा आकाश आधीच गंभीर जखमी अवस्थेत होता. त्याने आधी पत्नीचा धारदार शस्त्राने गळा चिरून खून केला आणि नंतर स्वतःला ब्लेड मारून इमारतीवरून उडी मारली. पोलिसांनी तत्काळ घटनास्थळाचा पंचनामा केला असून, गुन्ह्यात वापरण्यात आलेले हत्यार आणि खोलीतील इतर महत्त्वपूर्ण पुरावे गोळा करण्याचे काम सुरू केले आहे. तसेच, या पती-पत्नीमधील वादाच्या नेमक्या परिस्थितीचा आणि आजूबाजूच्या घटनाक्रमाचाही पोलिसांकडून बारकाईने तपास केला जात आहे. याप्रकरणी शुभांगीच्या वडिलांनी दिलेल्या अधिकृत तक्रारीच्या आधारे आकाश बारसकर याच्या विरोधात भारतीय न्याय संहितेच्या (BNS) कलम 103(1) अंतर्गत खुनाचा गुन्हा दाखल करण्यात आला आहे.

सध्या या संपूर्ण प्रकरणाचा पुढील तपास पोलिसांकडून सुरू असला तरी, पुढील कायदेशीर कारवाई ही पूर्णपणे आकाशच्या वैद्यकीय स्थितीवर अवलंबून असल्याचे पोलिसांकडून स्पष्ट करण्यात आले आहे. आकाशने दुसऱ्या मजल्यावरून मारलेल्या उडीमुळे त्याला गंभीर दुखापत झाली आहे आणि त्याच्यावर सरकारी रुग्णालयात वैद्यकीय उपचार सुरू आहेत. तो पूर्णपणे उपचाराला कसा प्रतिसाद देतो यावर पुढचे कायदेशीर पाऊल अवलंबून असेल. एका उच्चशिक्षित आयटी अभियंत्याने केवळ मालमत्तेच्या वादातून आपल्या पत्नीचा आणि न जन्मलेल्या बाळाचा जीव घेतला आणि स्वतःचेही आयुष्य उद्ध्वस्त करून घेतले, या घटनेमुळे सर्वत्र हळहळ व्यक्त केली जात आहे.