एप्रिल फुल डे.. मोदींचा फोटो असलेला केक कापून राष्ट्रवादी युवक काँग्रेसचं आंदोलन

राष्ट्रवादी युवकचे सोलापूर शहराध्यक्ष जुबेर बागवान यांच्या नेतृत्वाखाली अक्कलकोट रोडवरील पेट्रोल पंपावर हे आंदोलन करण्यात आले. यावेळी पेट्रोल भरण्यासाठी आलेल्या वाहनधारकांना कमळाचे प्रतिकात्मक फुल देऊन निषेधाच्या घोषणा देण्यात आल्या.

‘कमल का फुल ,एप्रिल फुल’.. ‘मोदी सरकार हाय हाय, एकही भूल, कमल का फुल,’ अशा स्वरुपात घोषणाबाजी यावेळी करण्यात आली आहे.

मागील काही दिवसात देशभरात प्रचंड महागाई वाढली आहे. त्यामुळे सामान्यांचं अक्षरश: कंबरडं मोडलं आहे. यामुळेच राष्ट्रवादी युवक काँग्रेसने भाजप आणि विशेषत: पंतप्रधान मोदींविरोधात आंदोलन केलं आहे.

LPG सिलिंडरच्या किंमतीत वाढ, २५० रूपयांनी वाढले दर

पाहा 1 एप्रिलपासून काय-काय महागणार?

• 1 एप्रिलपासून अँटीबायोटिक्स, अँटी व्हायरस यांच्यासह अत्यावश्यक औषधांच्या किंमती वाढणार आहेत. पेनकिलर आणि इतर औषधांसाठी 10 टक्क्यांपेक्षा जास्त दरवाढ करण्यास संमती देण्यात आली आहे त्यामुळे 800 हून जास्त औषधांच्या किंमती वाढणार आहेत.

• 1 एप्रिलपासून पहिल्यांदा घर खरेदी करणाऱ्यांन कायद्याच्या कलम 80EEA अंतर्गत मिळणारा लाभ केंद्र सरकारने बंद करण्याचा निर्णय घेतला आहे.

• आजपासून पोस्ट ऑफिस मासिक उत्पन्न योजना, ज्येष्ठ नागरिक बचत योजना, मुदत ठेव खात्यांवरील व्याजेचे पैसे फक्त बचत खात्यात उपलब्ध असतील. पोस्ट ऑफिसमध्ये जाऊन व्याजाचे पैसे रोखीने घेण्यावर बंधन

• म्युच्युअल फंडामधील गुंतवणुकीचे पैसे चेक, डिमांड ड्राफ्ट किंवा रोखीने देता येणार नाही, त्यासाठी यूपीआय किंवा नेट बँकिंग यांचा वापर करणं बंधनकारक

• काही वाहन कंपन्यांनी आजपासून त्यांच्या वाहनांच्या किमतीत वाढ करण्याची घोषणा केली आहे. टाटा मोटर्सने 1 एप्रिलपासून आपल्या व्यावसायिक वाहनांच्या किंमती 2 ते 2.5 टक्क्यांनी वाढवणार असल्याचे म्हटले आहे. मर्सिडीज-बेंझ इंडियाने 1 एप्रिलपासून आपल्या वाहनांच्या किंमतीत तीन टक्क्यांपर्यंत वाढ करणार असल्याचेही म्हटले आहे. टोयोटा 1 एप्रिल 2022 पासून आपल्या वाहनांच्या किमती 4 टक्क्यांनी वाढवणार आहे. BMW किंमती 3.5 टक्क्यांनी वाढवणार आहे.

• 1 एप्रिलपासून म्हणजेच आजपासून LPG सिलिंडरच्या किंमतीत वाढ झाली आहे. 250 रूपयांनी सिलिंडर महाग झाला आहे. तेल कंपन्यांनी कमर्शियल गॅस सिलिंडर वापरणाऱ्यांना हा फटका बसला आहे. ही दरवाढ व्यावसायिक गॅस सिलिंडरच्या दरात करण्यात आली आहे. मागच्या दोन महिन्यात आत्तापर्यंत 346 रूपयांची दरवाढ करण्यात आली आहे.