Petrol-Diesel Price : पेट्रोल-डिझेल दरवाढीचे चटके; १३ दिवसांत पेट्रोल ८ रुपयांनी महागलं

पाच राज्यातील विधानसभा निवडणुकीचे निकाल जाहीर झाल्यानंतर सर्वसामान्यांना पुन्हा एकदा पेट्रोल-डिझेल दरवाढीचे चटके बसू लागले आहेत. २२ मार्चपासून सुरू झालेली पेट्रोल-डिझेलची दरवाढ सुरूच असून, पेट्रोलबरोबर डिझेलच्या किंमती गगनाला भिडल्या आहेत. आज पेट्रोल-डिझेलच्या दरात ८० पैशांची वाढ करण्यात आली असून, गेल्या १३ दिवसांच्या कालावधीत पेट्रोल तब्बल ८ रुपयांनी महाग झालं आहे.

देशातील पेट्रोल-डिझेलचे दर वेगाने वाढू लागले आहेत. विधानसभा निवडणुकीचे निकाल जाहीर झाल्यानंतर तेल वितरक कंपन्यांनी २२ मार्चपासून दरवाढ सुरू केली. मागील १३ दिवसांत बहुतांश वेळा पेट्रोल-डिझेलच्या दरात लिटरमागे ८० पैशांची वाढ करण्यात आली. त्यामुळे दिवसेंदिवस पेट्रोल-डिझेलच्या वाढत्या दराच्या झळा सर्वासामान्यांना सोसाव्या लागत आहेत.

भारतीय तेल वितरक कंपनी इंडियन ऑईल कॉर्पोरेशनच्या ताज्या माहितीनुसार पेट्रोल-डिझेलचे दर प्रति लीटर ८० पैशांनी वाढले आहेत. त्यामुळे देशातील प्रमुख शहरातील पेट्रोलचे दर शंभरी पलिकडे गेले आहेत. देशाची आर्थिक राजधानी मुंबईत एक लिटर पेट्रोलसाठी ११८.४२ रुपये मोजावे लागत आहेत. त्याचबरोबर डिझेलही दरही लिटरमागे १०२.६४ रुपयांवर जाऊन पोहोचले आहेत.

इंडियन ऑईल कॉर्पोरेशनच्या माहितीप्रमाणे राजस्थानातील श्रीगंगानगरमध्ये पेट्रोल प्रति लीटर १२०.९६ रुपयांवर म्हणजे १२१ रुपयांवर जाऊन पोहोचलं आहे. तर डिझेलचे दर १०३.५१ रुपये प्रति लिटरवर गेले आहेत. राजधानी दिल्लीतही पेट्रोलचे दर प्रति लीटर १०३.४१ रुपये, तर डिझेल प्रति लीटर ९४.६७ रुपये दरांनी विकलं जात आहे.

कोणत्या दिवशी किती पैशांनी वाढले दर?

२२ मार्च – ८० पैसे

२३ मार्च – ८० पैसे

२५ मार्च – ८० पैसे

२६ मार्च – ८० पैसे

२७ मार्च – ५० पैसे

२८ मार्च – ३० पैसे

२९ मार्च – ८० पैसे

३० मार्च – ८० पैसे

३१ मार्च – ८० पैसे

०२ एप्रिल – ८० पैसे

०३ एप्रिल – ८० पैसे

गेल्या १३ दिवसांपैकी ११ दिवस पेट्रोल-डिझेलचे दर वाढले आहेत. २४ मार्च आणि १ एप्रिल रोजी इंधनाचे दर स्थिर राहिले. तर २७ मार्च रोजी ५० पैशांची, २८ मार्च रोजी ३० पैशांची दरवाढ वगळता इतर सर्वच दिवशी सलग ८० पैशांनीच दरवाढ करण्यात आली आहे. आंतरराष्ट्रीय तेल बाजारात तेलाच्या किंमती दररोज ठरतात. आंतरराष्ट्रीय तेल बाजारातील दरांचा आढावा घेऊन तेल कंपन्यांना पेट्रोल-डिझेलचे दर निश्चित करतात.

“पुढच्या निवडणुकीपर्यंत पेट्रोल २७५ रुपये लीटर होईल”

वाढत्या पेट्रोल-डिझेलच्या दरावरून समाजवादी पार्टीचे नेते अखिलेश यादव यांनी केंद्रावर निशाणा साधला. पेट्रोल डिझेलचे दर पुढील निवडणुकीपर्यंत २७५ रुपये लीटरवर जाईल, असं त्यांनी म्हटलं आहे. दररोज ८० पैशांनी वाढ म्हणजे महिन्याला २४ रुपयांची वाढ अशा पद्धतीनेच दर वाढत राहिले, तर पुढील निवडणुका ज्या नोव्हेंबर-डिसेंबरमध्ये होणार आहेत. म्हणजे तोपर्यंत पेट्रोल-डिझेलच्या दरात १७५ रुपयांची दरवाढ होईल, असं म्हणत त्यांनी केंद्रावर टीका केली आहे.