‘शेवाळे 2024 मध्ये खासदार नसतील’, संजय राऊतांनी बोम्मईंनाही सुनावलं

दिल्लीत माध्यमांशी बोलताना संजय राऊतांनी बोम्मईंवर टीका केली. बोम्मईंनी संजय राऊतांना चीनचे एजंट म्हटलं. त्यावर राऊत म्हणाले, ‘ते जर आम्हाला चीनचे एजंट म्हणत असतील, तर चीनच्या पंतप्रधानांना, चीनच्या राष्ट्रप्रमुखांना अहमदाबादमध्ये बोलवून, झोपाळ्यावर झुलवून पापडी गाठिया खायला घालवून त्यांचा सन्मान करणाऱ्यांना काय म्हणाल?’ असा सवाल संजय राऊतांनी बोम्मईंना केलाय.

संजय राऊत पुढे म्हणाले, ‘आम्ही चीनचे एजंट कसे, चीनने जगभरात घुसखोरी सुरू केलीये आणि त्यात आपला देशही आहे. त्याच पद्धतीने घुसखोरी करण्याचा प्रयत्न कर्नाटक राज्य हे सांगली, सोलापूरात करत आहे. बेसावध पद्धतीने. तुम्ही जर असं करत असाल तर आम्हालाही तोच मार्ग अवलंबवावा लागेल, असं मी म्हटलंय.’

‘तुम्हाला चीनचा इतका तिटकारा असेल, तर पंतप्रधानांचा निषेध करा. त्यांनीच चीनचे दरवाजे उघडले आहेत. महाराष्ट्र कर्नाटक सीमावादाला आग लावण्याचं काम बोम्मई करत आहेत. दिल्लीत गृहमंत्र्यांसमोर (अमित शाह) जे ठरलं होतं, हे ते मानायला तयार नाहीत. आपल्याच पक्षाच्या नेत्याचा आदेश मानायला तयार नाहीत. ते आमचे संस्कार आणि संस्कृती काढताहेत. आम्हाला त्यांनी शिकवू नये,’ असं प्रत्युत्तर संजय राऊतांनी बसवराज बोम्मईंना दिलं.

‘बोम्मई यांची जीभ जास्त वळवळतेय, ती यासाठी की महाराष्ट्राचे मुख्यमंत्री आणि उपमुख्यमंत्री यांची तोंड बंद आहेत. विधानसभेत इतर सगळ्याविषयांवर चर्चा झाल्या. गोंधळ झाला. अनावश्यक विषय चर्चेत आले. व्यक्तिगत विषयावर खोके सरकारचे आमदार बोलत होते. त्यांना कर्नाटक सरकारने निषेध ठराव मंजूर केला, त्याची माहिती नसावी. हेच याचं महाराष्ट्र प्रेम,’ अशी टीका राऊतांनी केलीये.

‘हा वाद दोन राज्यात नाही. बोम्मईंनी त्यांच्या फायद्यासाठी हा वाद निर्माण केला आहे. आम्ही चीनचे एजंट मग तुम्ही कोणत्या देशाचे एजंट आहात. देशाच्या गृहमंत्र्यांसमोर एखादी गोष्ट ठरलीये, तर तुम्ही का मानत नाहीत. महाराष्ट्रात बोम्मई आणि त्या सरकारविरुद्ध निषेध ठराव मांडून मंजूर केला पाहिजे. उद्या तुम्ही बोम्मईंनाही क्लिनचीट द्याल,’ अशी टीका संजय राऊत यांनी शिंदे-फडणवीस सरकारवर केली.

एकनाथ शिंदेंवर आरोप, संजय राऊत राहुल शेवाळेंबद्दल काय म्हणाले?

एकनाथ शिंदे यांच्यावर आरोप करताना कायदेशीर सल्ला घ्यावा, असं शिंदे गटाच्या खासदारांनी पत्रकार परिषदेत म्हटलं होतं. त्यासंदर्भात राऊत म्हणाले, आम्ही कागदपत्रे, न्यायालयाचे आदेश यावर बोलतोय. हा तारांकित प्रश्न भाजपच्या चंद्रशेखर बावनकुळे यांनी विचारला आहे, त्यामुळे त्यांनी हा सल्ला भाजप प्रदेशाध्यक्षांना द्यावा.’

‘राहुल शेवाळे म्हणजे देशाचे अॅटर्नी जनरल आहेत का? उद्या ते संसदेतही नसतील… 2024 मध्ये. तुम्ही मला त्यांच्याबद्दल सांगू नका. 20 वर्षांपासून खासदार आहोत. आम्हाला कायदा माहितीये आहे. आम्ही महाराष्ट्रात राज्य केलंय. आम्हीही केंद्रात होतो. आम्हाला कोणते विषय काय आहेत, ते माहितीये,’ असं उत्तर संजय राऊत यांनी शिंदे गटाला दिला.