आमदारकीचा राजीनामा देऊन पुन्हा निवडणूक लढवणार असं थेट ठाकरेंना आव्हान देणारे राज्याचे माजी महसूल राज्यमंत्री आणि सिल्लोडचे आमदार अब्दुल सत्तार वेगळ्याचं कारणामुळे वादात सापडले आहेत. अब्दुल सत्तार यांचं नाव चर्चेत येण्याचं कारण ठरलं टीईटी म्हणजे शिक्षक पात्रता परीक्षा घोटाळा. याच प्रकरणामुळे सत्तारांचं नाव चर्चेत आलं असून, त्यावर सत्तारांनी त्यांची भूमिका स्पष्ट केली आहे.
ADVERTISEMENT
महाराष्ट्र राज्य परीक्षा परिषदेच्या वतीने २०१९ मध्ये घेण्यात आलेल्या शिक्षक पात्रता परीक्षेत घोटाळा झाल्याचं पोलीस तपासातून समोर आलं होतं. आरोग्य भरतीमध्ये गैरव्यवहार झाल्याच्या प्रकरणाचा पुणे पोलीस तपास करीत असतानाच हा शिक्षक पात्रता परीक्षेचा (टीईटी) घोटाळा उघडकीस आला होता.
टीईटी परीक्षेत झालेल्या घोटाळ्यानं राज्यात खळबळ उडाली होती. या प्रकरणाचा तपास पुणे पोलिसांकडून सुरू आहे. या घोटाळ्यात राज्य परीक्षा परिषदेचे बडे अधिकारी, कर्मचारी आणि परीक्षा घेणाऱ्या खासगी कंपन्यांच्या संचालकांना पोलिसांनी बेड्या ठोकलेल्या आहेत. पैसे देऊन टीईटी परीक्षा उत्तीर्ण झालेल्या शिक्षकांची यादीच पोलिसांनी तयारी केली आहे. याच यादीमुळे आता टीईटी परीक्षेचं कनेक्शन सिल्लोडपर्यंत पोहोचल्याची चर्चा राज्यभरात सुरू झालीये.
TET Scam : पैसे देऊन शिक्षक झालेल्यांच्या नोकऱ्या जाणार?; ७,८८० जणांची यादी तयार
हिना कौसर अब्दुल सत्तार शेख आणि उझमा नाहीद अब्दुल सत्तार शेख यांची नावं असलेली यादी व्हायरल
परीक्षा परिषदेनं परीक्षेत गैरप्रकार केलेल्या उमेदवारांची यादी जाहीर केली आहे. यात ७ हजार ८७४ शिक्षक बनलेल्या उमेदवारांचा समावेश असल्याची माहिती पोलिसांकडून देण्यात आली होती. गैरप्रकारात समावेश असलेल्या संबंधित उमेदवारांची प्रमाणपत्रे परिषदेकडून रद्द करण्यात आली असून, प्रमाणपत्रे रद्द केलेल्यांना यापुढे टीईटी परीक्षा देण्यावर कायमस्वरूपी बंदी घालण्यात आली आहे.
राज्य परीक्षा परिषदेने जाहीर केलेल्या सात हजारांहून अधिक उमेदवारांच्या यादीमध्ये सिल्लोडचे आमदार आणि माजी महसूल राज्यमंत्री अब्दुल सत्तार यांच्या दोन मुलींच्या नावांचा समावेश असल्याची माहिती समोर आलीये. हीना कौसर अब्दुल सत्तार शेख आणि उझमा नाहीद अब्दुल सत्तार शेख या दोन मुलीची नावे असलेली यादी समोर आली आहे.
TET Exam Scam : अब्दुल सत्तारांनी काय केला खुलासा?
“२०१९ मध्ये झालेली टीईटी परीक्षा माझ्या दोन मुलींनी दिली होती. त्या पात्र ठरल्या नव्हत्या. आज अचानक मी यादी बघितली. या चार वर्षांमध्ये माझ्या मुली पास झाल्या असतील, आम्ही काही फायदा घेतला असेल, तर शिक्षण खात्यामधून माहितीच्या अधिकारात माहिती घेता येते”, असं अब्दुल सत्तार यांनी म्हटलं आहे.
“माझ्या संस्थेत माझ्या मुली २०१७ मध्ये नोकरीला लागलेल्या आहेत. या परीक्षेत त्या अपात्र झालेल्या आहेत. त्यांची प्रमाणपत्र माझ्याकडे आहेत. कुणाला लागत असतील, तर मी देतो. आज माझी बदनामीचा प्रयत्न सुरू आहे.”
TET Exam Scam: ‘हे 10 लाख रुपये.. मला सुपेने दिलेले’, पोलिसांकडे कोणी जमा केली 10 लाखांची रोकड?
“आमची चूक असेल, तर आमच्या मुलींवर कारवाई केली पाहिजे. चूक नसेल, तर ज्याने हे कृत्य ज्याने केले, त्याला फासावर लटकवायला पाहिजे. याची नीट चौकशी करण्याची मागणी मी करतोय. अशा पद्धतीने बदनाम करण्याचं काम कुणीही करू नये. अशा पद्धतीने बदनामी करणाऱ्यावर कारवाई करण्याची मागणीही मी करणार आहे”, असं अब्दुल सत्तार म्हणाले.
ADVERTISEMENT