पुण्यातील 'त्या' व्यक्तीला परदेशात जायला मदत कोणी केली? अजितदादांचा मुरलीधर मोहोळांवर हल्लाबोल

हेही वाचा : दिवगंत मनसे नेते रमेश वांजळेंची कन्या पुणे मनपा निवडणुकीतील दुसऱ्या क्रमांकाची श्रीमंत उमेदवार, संपत्ती किती?

एका व्यक्तीला परदेशात जाण्यास मदत कोणी केली, त्याचा पासपोर्ट कोणी काढून दिला आणि तो देशाबाहेर कसा पळून गेला, याची चौकशी झाली पाहिजे, असं म्हणत अजित पवारांनी थेट सवाल उपस्थित केला. गेल्या काही वर्षांत भाजपने कोणाकोणाला आणि कशा प्रकारे उमेदवारी दिली, याची माहितीही बाहेर काढावी, असं आव्हान देत त्यांनी मुरलीधर मोहोळ यांनीच निलेश घायवळला परदेशात जाण्यास मदत केल्याचे संकेत दिले.

सन 1992 ते 2017 या कालावधीत पिंपरी-चिंचवड शहराचा सर्वांगीण विकास केला असून शहराचं रूपडं पालटल्याचा दावा अजित पवारांनी केला. मात्र, 2017 साली एक वेगळीच राजकीय परिस्थिती निर्माण झाली होती. त्याच काळात विठ्ठल मूर्ती घोटाळ्याचा मुद्दा पुढे आला. विशेष म्हणजे ज्या महापौरांच्या कार्यकाळात हा प्रकार घडला, तेच आज भाजपकडून आमच्याविरोधात निवडणूक लढवत असल्याकडे त्यांनी लक्ष वेधलं. शरद पवारांनी पिंपरी-चिंचवडमध्ये विकासाला कशी दिशा दिली, हे सांगत अजितदादांनी शरद पवारांचं विशेष कौतुक केलं.

यावेळी त्यांनी भाजपवर गंभीर आरोपांची झोड उठवत शहरात हफ्तेखोरी सुरू असल्याचा दावा केला. ‘अर्बन स्ट्रीट’च्या नावाखाली रस्त्यांची दुरवस्था करण्यात आली असून अनेक ठिकाणी अतिक्रमण वाढलं आहे. अशा भागांमध्ये खुलेआम हफ्तेखोरी सुरू असल्याचं दिसून येतं, असा आरोप त्यांनी केला. गेल्या नऊ वर्षांत भाजप सत्तेत असताना असा विकास झाला आहे, अशी टीका त्यांनी केली. “मी कोणावरही पुराव्यांशिवाय आरोप करणार नाही. योग्य वेळी सर्व पुरावे मांडेन,” असा ठाम इशाराही अजित पवारांनी दिला. तसेच, गुन्हेगारी पार्श्वभूमी असलेल्या उमेदवारांवरून मंत्री मुरलीधर मोहोळ यांनी केलेल्या टीकेलाही त्यांनी प्रत्युत्तर दिलं.

इतर महत्त्वाच्या बातम्या 

दिवगंत मनसे नेते रमेश वांजळेंची कन्या पुणे मनपा निवडणुकीतील दुसऱ्या क्रमांकाची श्रीमंत उमेदवार, संपत्ती किती?