Santosh Deshmukh Murder Case : वाल्मिक कराड अडकला कचाट्यात.. कोर्टाचा मोठा निर्णय, उशिरा रात्री काय-काय घडलं?

नेमकं काय घडलं कोर्टात?

वाल्मिकी कराड हा बीड सीआयडीच्या ताब्यात आल्यानुसार सगळ्यात आधी त्याची वैद्यकीय चाचणी करण्यात आली. त्यानंतर त्याला केज सत्र न्यायालयात रात्री उशिरा हजर करण्यात आलं. खंडणी प्रकरणात चौकशीसाठी वाल्मिकीचा ताबा मिळावा यासाठी रात्री उशिरा सुनावणी पार पडली. यावेळी सरकारी वकील जे. बी. शिंदे यांनी वाल्मिक कराडला 15 दिवसांची सीआयडी कोठडी मिळावी यासाठी जोरदार युक्तिवाद केला.

हे ही वाचा>> '...तर धनंजय मुंडेंही आत जाऊ शकतात', वाल्मिक कराडच्या अटकेनंतर सुरेश धसांच्या वक्तव्याने खळबळ

तर वाल्मिक कराड सीआयडीला शरण आले आहेत असून त्यांना जामीन मिळायला हवा, असा युक्तिवाद करत वाल्मिकीचे वकील अशोक कवडे यांनी त्याच्या बचावाचा प्रयत्न केला. मात्र, कोर्टाने वाल्मिक कराडच्या वकिलांची मागणी फेटाळून लावत वाल्मिकीला 15 दिवसांची सीआयडी कोठडी सुनावली आहे. त्यामुळे आता संतोष देशमुख हत्या प्रकरण आणि खंडणी या सगळ्याची सीआयडीला चौकशी करता येणार आहे.

ऐनवेळी सरकारी वकिलाने केस लढण्यास दिला नकार, अन्...

वाल्मिक कराडच्या खंडणी केस प्रकरणातील वकील बदलण्यात आला आहे. सरकारी वकील म्हणून नेमणूक करण्यात आलेल्या एस. एस. देशपांडे यांनी अचानक आपण ही केस लढविण्यास तयार नसल्याचं सांगितलं. त्याबाबत त्यांनी कोर्टाकडे पत्रंही दिलं. वैयक्तिक कारणास्तव त्यांनी ही केस लढण्यास नकार दिला आणि अन्य वकील नेमावा असं पत्रात म्हटलं. त्यानंतर जे. बी. शिंदे यांची सरकारी वकील म्हणून नियुक्ती करण्यात आली.

'हत्या आणि खंडणीचं कनेक्शन म्हणून वाल्मिक कराडची कोठडी ही गरजेची', सरकारी वकिलांचा मोठा युक्तिवाद

हत्येचा मुख्य आरोपी सुदर्शन घुले हा फरार आहे त्यामुळे वाल्मिक कराड याची कोठडी महत्त्वाची आहे. कराड याची कोठडी मिळाल्याशिवाय सुदर्शन घुले याचा शोध घेणे हे कठीण व अवघड होईल. हत्या आणि खंडणीच्या गुन्ह्यात कराडचा सहभाग आहे हे तपासायचे आहे त्यासाठी त्याची कोठडी मिळणं हे गरजेचं आहे. असा जोरदार युक्तिवाद सरकारी वकील जे. बी. शिंदे यांनी सीआयडीच्या वतीने केला. 

हे ही वाचा>> वाल्मिक कराड आला शरण.. CID अधिकारी म्हणाले आम्ही तर...

तसेच मोबाइलवरील संभाषण हे कराड याचंच आहे का याची देखील तपासणी करायची आहे. त्यामुळे तपासासाठी सीआयडीला कराडची पंधरा दिवसांची पोलीस कोठडी मिळावी. अशी मागणी यावेळी करण्यात आली.

संतोष देशमुख यांच्या हत्येत वाल्मिक कराडचा हात आहे का? हे देखील तपासायचं आहे असे देखील सीआयडीने म्हटले आहे. हत्या आणि खंडणीचं कनेक्शन म्हणून कराडची कोठडी ही गरजेची आहे. असा मोठा युक्तिवाद सरकारी वकिलांनी केला आहे. 

दोन्ही गुन्हे संबंधित असल्याने तपास करायचा आहे आणि तपास महत्त्वाचा असल्याचे आहे. खुनाच्या गुन्ह्यातील मुख्य आरोपी सुदर्शन घुले हा वाल्मिक कराडच्या सांगण्यावरून काम करायचा. सध्या सुदर्शन घुले आणि आणखी काही फरार आरोपी आहेत त्यांचा देखील शोध बाकी आहे. असं म्हणत सरकारी वकिलांनी सीआयडीच्या वतीने वाल्मिक कराडवर खळबजनक आरोप केले आहेत.

'वाल्मिक कराडवर केवळ खंडणीचा आरोप', बचाव पक्षाच्या वकिलांचा युक्तिवाद

राजकीय द्वेषापोटी हत्या प्रकरणात नाव गवण्यात आल्याचे युक्तिवाद  वाल्मिक कराडचे वकील अशोक कवडे यांनी कोर्टासमोर केला.

वाल्मिक कराड याच्यावर फक्त दोन कोटींची खंडणी मागितलेला आरोप आहे. आवाजाचे नमुने देण्यास तयार. पण त्यासाठी कोठडी देण्याची गरज नाही. आरोपी कराडला पंधरा दिवसांची पोलीस कोठडी मागणं हे चुकीचं. असाही वकिलांनी युक्तिवाद केला.

वाल्मिक कराड हे शरण आले आहेत. तसेच खंडणी मागितल्याचा फक्त आरोप झाला आहे. त्यामुळे त्यांना न्यायालयीन कोठडी द्या. कराड हा सामाजिक कार्यकर्ता आहे. तसेच तो गरीब राजकारणी आहे. असा देखील वाल्मिक कराडच्या वकिलांनी युक्तिवाद यावेळी केला.

कोर्टाने वाल्मिक कराडला सुनावली 15 दिवसांची कोठडी

सीआयडीकडून कोर्टात युक्तिवाद करण्यात आला होता की, वाल्मिक कराडची कसून चौकशी करायची आहे. खुनाच्या गुन्ह्यातील आरोपी सुदर्शन घुले फरार असल्यामुळे आणि दोन कोटी रुपयांची खंडणी मागितल्या प्रकरणी आरोप असलेल्या वाल्मिक कराडची चौकशी करणं आवश्यक आहे. याच युक्तिवादाचा विचार करता कोर्टाने वाल्मिक कराडला 15 दिवसांची सीआयडी कोठडी सुनावली आहे.