दिल्लीमध्ये CJP चं आज पुन्हा आंदोलन; जंतर-मंतरकडे कूच, नेमकं काय घडतंय?

हेही वाचा : ‘24 तासांत आंदोलकांची सुटका करा, अन्यथा उपोषणाला बसेन!’ अभिजीत दिपकेंसाठी मोठा नेता उतरणार मैदानात

दिल्लीमध्ये कॉकरोच जनता पार्टीच्या (CJP) आंदोलनामुळे मध्य दिल्ली, नवी दिल्ली आणि कनॉट प्लेस परिसरातील वाहतुकीवर परिणाम होण्याची शक्यता आहे. मुख्य निवडणूक आयुक्त ज्ञानेश कुमार यांच्या राजीनाम्याची मागणी करत पक्षाने आंदोलन सुरू ठेवण्याची घोषणा केली आहे.

दिल्लीच्या प्रमुख रस्त्यांवरील वाहतूक वळवली जाण्याची शक्यता

CJP च्या आंदोलनाच्या पार्श्वभूमीवर मध्य दिल्ली, नवी दिल्ली आणि कनॉट प्लेस परिसरातील प्रमुख रस्त्यांवर वाहतूक वळवली जाण्याची शक्यता आहे. शंकर रोड-वंदे मातरम टी-पॉइंट, धौला कुआँ उड्डाणपूल, झंडेवालान, पंचकुइयां, मंडी हाऊस, डॉ. दिनेश नंदिनी डालमिया चौक आणि राम चरण अग्रवाल चौक या ठिकाणी वाहतुकीत बदल होऊ शकतात. याशिवाय मिंटो रोड-दीनदयाळ उपाध्याय मार्ग, गुरू नानक चौक आणि चेम्सफोर्ड रोड-कनॉट प्लेस आउटर सर्कल टी-पॉइंट परिसरातही वाहतूक वळवली जाण्याची शक्यता आहे. त्यामुळे या भागातून प्रवास करणाऱ्या नागरिकांना वाहतुकीतील संभाव्य बदलांचा विचार करून प्रवासाचे नियोजन करावे लागणार आहे.

दरम्यान, शनिवारी CJP चे संस्थापक अभिजीत दिपके आणि पक्षाचे नेते सौरव दास व आशुतोष रांका यांना ताब्यात घेण्यात आले होते. दिल्लीतील निर्बंध, मेट्रो आणि रेल्वे वाहतूक रोखण्यात आल्याचे आरोप तसेच नागरिकांना ताब्यात घेण्याच्या मुद्द्यांवरून सर्वोच्च न्यायालयात रविवारी सुनावणी होणार आहे. या प्रकरणांशी संबंधित दाखल करण्यात आलेल्या अवमान याचिकेवर सर्वोच्च न्यायालयाचे विशेष खंडपीठ सुनावणी करणार आहे. त्यामुळे CJP च्या आंदोलनासंदर्भातील घडामोडींसोबतच सर्वोच्च न्यायालयातील सुनावणीकडेही लक्ष लागले आहे.