तोतया IAS महिलेने मराठवाड्यातील खासदाराला लावला चुना, फसवणूक झाल्याचं समजताच म्हणाले...

छत्रपती संभाजीनगर पोलिसांकडून कल्पना भागवत यांची सखोल चौकशी सुरू असून, तिच्या विविध बँक खात्यातील व्यवहारांची छाननी केली जात आहे. या तपासात हिंगोलीचे खासदार नागेश आष्टीकर यांचे नाव समोर आल्याने प्रकरणाला नवीन वळण मिळाले आहे. भागवतच्या खात्यावर जमा झालेल्या रकमांमध्ये आष्टीकर यांच्या नावाचा उल्लेख सापडल्याने पोलिस अधिक तपास करत आहेत.

हेही वाचा : 4 वर्षांच्या चिमुरडीला बाथरूममध्ये नेलं, नंतर जमिनीवर डोकं आपटलं, गळा दाबून... मदतनीसनं ओलांडली क्रूरतेची सीमा

या प्रकरणावर खासदार नागेश आष्टीकर यांनी प्रतिक्रिया देताना, सांगितल्या जाणाऱ्या रकमेबाबत आक्षेप नोंदवला. त्यांनी स्पष्ट केले की, “बोलली जात असलेली इतकी मोठी रक्कम माझ्याकडून दिली गेलेली नाही.” कल्पना भागवत या एका नातेवाईकाच्या ओळखीने भेटल्याचे त्यांनी सांगितले. स्वतःला राम भद्राचार्य महाराज यांच्या शिष्य म्हणून ओळख देत तिने धार्मिक कार्यासाठी मदतीची आवश्यकता असल्याचे सांगितले होते.

तिने भोकर येथे मंदिर बांधकामासाठी काही आर्थिक मदत मागितली होती. त्याचदरम्यान तिने स्वतःला आयएएस प्रशिक्षणार्थी असल्याचे सांगत, वडिलांचे निधन झाल्याने तात्पुरती मदत करण्याची विनंती केली. एकदा घरभाडे बाकी असल्याचे सांगतही तिने पैसे मागितल्याचे खासदारांनी सांगितले. मात्र, सध्या तिच्या चौकशीत जेवढी रक्कम सांगितली जात आहे, तेवढी दिली नसल्याचेही त्यांनी नमूद केले.

पोलिस तपासात आता कल्पना भागवत हिने अशा प्रकारे आणखी किती लोकांना फसवले आहे, याचा शोध घेतला जात आहे. बनावट ओळखीच्या जोरावर प्रतिष्ठित व्यक्तींनाही गंडा घालण्याचा तिचा प्रयत्न उघड झाल्याने या प्रकरणाला गंभीर वळण लागले आहे. आगामी तपासात आणखी नवे खुलासे होण्याची शक्यता व्यक्त केली जात आहे.

इतर महत्त्वाच्या बातम्या 

अवघ्या 19व्या वर्षी 'दंडक्रम पारायण'! सतत 50 दिवस 2000 वेदमंत्रांचे पठण... अहिल्यानगरच्या महेशने रचला नवा विक्रम