हेही वाचा : 'कोण कोणाशी युती करतो, याची चिंता नको त्याचा हिशोब आमच्याकडे..', शिंदेंचं थेट राज ठाकरेंनाही आव्हान?

ठाकरेंची साथ सोडण्याचं कारण काय?

दरम्यान, ठाकरेंची साथ सोडण्याच्या कारण काय? याबाबत राजन तेली यांनी भाष्य केलंय. उद्धव ठाकरेंच्या शिवसेनेत काम करण्याची संधी मिळत नव्हती. शिवाय, संघटन बांधणीसाठी मी जबाबदारी सोपवण्याची मागणी केली. मात्र, माझ्याकडे दुर्लक्ष करण्यात आल्याचं राजन तेली म्हणाले आहेत. 

राजन तेली कोण आहेत? 

राजन तेली यांनी आपल्या राजकीय कारकिर्दीची सुरुवात 1985 साली कणकवली महाविद्यालयात विद्यार्थी सेनेचे प्रतिनिधित्व करत केली. 1988 मध्ये ते कणकवलीतील शिवसेना शाखाप्रमुख झाले. त्यानंतर 1991 साली त्यांची शिवसेना जिल्हाप्रमुख म्हणून नियुक्ती झाली. 1995 मध्ये त्यांनी सिंधुदुर्ग जिल्हा परिषदेचे जिल्हाध्यक्ष पद भूषविले. 1997 मध्ये त्यांच्यावर कोकण सिंचन महामंडळाच्या उपाध्यक्षपदाची जबाबदारी सोपवण्यात आली. 2005 मध्ये नारायण राणे यांच्यासह त्यांनी शिवसेनेला रामराम ठोकत काँग्रेसमध्ये प्रवेश केला. त्यानंतर 2007 साली ते विधान परिषदेचे आमदार झाले. 2012 मध्ये ते सिंधुदुर्ग जिल्हा सहकारी बँकेचे चेअरमन म्हणून निवडून आले. पुढे 2016 साली भारतीय जनता पक्षाने त्यांच्यावर विश्वास दाखवत त्यांना राज्य सचिवपदाची जबाबदारी देण्यात आली होती. दरम्यान, 2024 मध्ये त्यांनी तब्बल 19 वर्षांनी ठाकरेंच्या शिवसेनेत घरवापसी केली होती. मात्र, आता त्यांनी ऑक्टोबर 2025 मध्ये त्यांनी शिंदेंच्या शिवसेनेत प्रवेश केलाय. 

कोण कोणत्या पक्षात केलंय काम? 

1988 मध्ये शिवसेनेत कामाला सुरुवात 

2005 मध्ये नारायण राणे यांच्यासह काँग्रेसमध्ये प्रवेश 

2016 मध्ये भाजपात प्रवेश 

2024 मध्ये ठाकरेंच्या शिवसेनेत प्रवेश 

वैभव नाईक यांची प्रतिक्रिया 

ठाकरे गटाचे नेते वैभव नाईक म्हणाले, राजन तेली सोडून गेले तरी सिंधुदुर्गात ठाकरेंच्या शिवसेनेवर कोणताही परीणाम  होणार नाही. त्यांनी या अगोदर अनेक पक्ष बदलले आहेत. मागच्या विधानसभा निवडणुकीत स्थानिक कार्यकर्ते सावंतवाडीत इच्छुक असताना शिवसेनेच्या काही नेत्यांनी राजन तेली यांना पक्षप्रमुख उद्धव ठाकरेंकडे नेऊन त्यांना तिकीट देण्यात आलं. मात्र गेल्या वर्षभर ते शिवसेनेत सक्रीय नव्हते. सत्तेसोबत जाण्याचा त्यांचा दृष्टिकोन होता. पालकमंत्री असणाऱ्या नितेश राणेंवर राजन तेली हे सकाळी टीका करतात आणि त्याच संध्याकाळी राजन तेली यांना मोठे भाऊ असलेल्या निलेश राणे यांनी शिवसेनेत प्रवेश करून घेतला. त्यामुळे येणाऱ्या काळात जिल्ह्याच्या राजकारणात अराजकता माजेल. ज्या राजन तेलींनी नारायण राणे, दिपक केसरकर यांच्यावर टीका केली तेच आता मांडीला मांडी लावून बसणार आहेत का? याची उत्तर येणाऱ्या काळात लोकांना द्यावी लागतील.
 

दीपक केसरकरांकडून राजन तेलींचा दोन वेळेस पराभव 

2014 च्या विधानसभा निवडणुकीत दीपक केसरकर हे शिवसेनेच्या उमेदवार म्हणून मैदानात उतरले होते. त्या वेळी त्यांचा सामना भाजपच्या राजन तेली यांच्याशी झाला. यावेळी दीपक केसरकर यांनी मोठ्या फरकाने विजय मिळवत तेली यांचा पराभव केला. केसरकर यांना तब्बल सत्तर हजार नऊशे मते मिळाली, तर तेली यांना जवळपास तीस हजार मतं मिळाली. एकेचाळीस हजारांहून अधिक मतांच्या आघाडीसह केसरकर विधानसभेत सलग दुसऱ्यांदा पोहोचले.

2019 च्या विधानसभा निवडणुकीत  राज्यात शिवसेना-भाजप युती झाली होती. या युतीत सावंतवाडी मतदारसंघ शिवसेनेकडे गेला होता.  केसरकर यांना पुन्हा उमेदवारी देण्यात आली. या निवडणुकीत राजन तेली यांनी अपक्ष म्हणून लढवले. केसरकरांना जवळपास सत्तर हजार मते मिळाली, तर तेली यांना सुमारे 56 हजार मते मिळाली. तेरा हजार मतांची आघाडी घेत केसरकर सलग तिसऱ्यांदा विधानसभा गाठण्यात यशस्वी झाले.

हेही वाचा : 'कोण कोणाशी युती करतो, याची चिंता नको त्याचा हिशोब आमच्याकडे..', शिंदेंचं थेट राज ठाकरेंनाही आव्हान?