अजित पवारांच्या राष्ट्रवादीने उमेदवारी दिलेल्या 25 वर्षीय महिलेचा मृत्यू, प्रचाराला जात असताना काय घडलं?

मृत महिलेची ओळख अलमास परवीन शेख सलीम (वय 25, रा. अकोट) अशी झाली आहे. त्या अकोट नगर परिषदेमध्ये राष्ट्रवादी काँग्रेस (अजित पवार गट) यांच्या प्रभाग क्रमांक 4 मधून नगरसेवकपदाच्या उमेदवार होत्या. कुटुंबासह प्रचारासाठी जात असताना हा अपघात घडल्याची माहिती पोलिसांनी दिली आहे.

पोलिसांकडून मिळालेल्या माहितीनुसार, शनिवारी दुपारी अलमास परवीन आपल्या पती शेख सलीम शेख जब्बार आणि दोन वर्षांच्या मुलीसह एमएच 27 डीके 4820 या नंबरच्या दुचाकीवरून परतवाडा ते चांदूर बाजार मार्गाने जात होत्या. यावेळी अज्ञात वाहनाने अचानक दिलेल्या जोरदार धडकेत त्या रस्त्यावर फेकल्या गेल्या. धडक इतकी भयंकर होती की, अलमास परवीन यांच्या डोक्यावर गंभीर दुखापत झाली आणि त्या जागीच ठार झाल्या.

हेही वाचा : विधानसभेला आतून पाठिंबा देण्यासाठी रामभाऊ 35 कोटी देतो म्हणाला, फडणवीसांकडे घेऊन गेला : जयसिंह मोहिते पाटील

अपघातानंतर वाहनचालक दुचाकीला धडक देऊन घटनास्थळावरून फरार झाल्याचे प्रत्यक्षदर्शींनी सांगितले. माहिती मिळताच परतवाडा पोलिस व वाहतूक शाखेचे कर्मचारी घटनास्थळी दाखल झाले. जखमी पतीला तातडीने उपजिल्हा रुग्णालयात भरती करण्यात आले, तर मुलीला अधिक उपचारांसाठी अमरावती जिल्हा सामान्य रुग्णालयात हलविण्यात आले आहे.

अलमास परवीन यांचे माहेर अचलपूर तालुक्यातील शिंदी बुद्रूक येथे असल्याचेही पोलिस सूत्रांनी सांगितले. अपघाताची खबर मिळताच परिसरातील नागरिकांनी मोठ्या संख्येने घटनास्थळी धाव घेतली आणि पोलिसांना माहिती दिली.

दरम्यान, अपघातावेळी दुचाकीवरील पिशवीतून प्रचार साहित्य आणि अंदाजे 10 हजार रुपये रोख मिळाल्याची नोंद पोलिसांनी केली आहे. हे साहित्य निवडणुकीच्या प्रचारासाठी वापरण्यात येणार होते. पोलिसांनी दोन्ही वस्तू ताब्यात घेतल्या आहेत. सध्या अज्ञात वाहनचालकाविरोधात गुन्हा नोंदविण्याची प्रक्रिया सुरू असून, या प्रकरणाचा अधिक तपास परतवाडा पोलिस करत आहेत. या घटनेमुळे अकोट परिसरात हळहळ व्यक्त केली जात आहे.

इतर महत्त्वाच्या बातम्या 

आम्हाला धमक्या देता, मी शंकरराव मोहिते पाटलांचा नातू; धैर्यशील मोहितेंचा राम सातपुतेंना छातीठोक इशारा VIDEO