'तुम्हाला सत्ता मिळाल्याचा राग नाही, पण...' राज ठाकरेंची तोफ धडाडली, थेट भाजपच्या माजी मंत्र्याची 'ती' गोष्ट सांगितली!

'ही कालची गोष्ट तुम्हाला सांगतो. माजी केंद्रीय गृह सचिव आणि मोदींच्या काळातील भाजपचे माजी मंत्री आर के सिंग यांनी SIR बद्दल काय सांगितलंय ते तुम्ही ऐकून घ्या. आर के सिंग यांच्या मते, 'कलम 21 अंतर्गत जे SIR सुरू आहे.. अपवादत्मक परिस्थितीत कारणे लेखी नोंदवून आणि विशिष्ट मतदारसंघ किंवा भागापुरतं करता येते. त्यामुळे संपूर्ण देशात एकाच वेळी SIR करणं हे बेकायदेशीर आहे. SIR संपूर्ण देशात किंवा राज्यात राबविण्याची कायद्यातच तरतूद नाही. समजा मोठी नैसर्गिक आपत्ती आली आणि त्यामुळे मोठ्या प्रमाणात नागरिक स्थलांतरित झाले किंवा खूप खोटे मतदार असल्याच्या मोठ्या प्रमाणात तक्रारी आल्या तर आणि तरच SIR केलं जाऊ शकतं. पण इथे सरसकट SIR कशासाठी केलं गेलं?'

असं म्हणत त्यांनी 'संपूर्ण देशात किंवा राज्यात सरसकट SIR करण्याची कायद्यात तरतूद नाही,' असा दावा केला. तसेच विधानसभा निवडणुकीपूर्वी मतदारसंख्येत वाढ झाल्याचा दावा आणि आता SIRच्या माध्यमातून मोठ्या संख्येने मतदार वगळले जात असल्याचा मुद्दा राज ठाकरेंनी उपस्थित केला.

'SIR मधून 2 कोटी लोक बाहेर काढले, हे कोण आहेत?'

राज ठाकरेंनी SIRमधून '2 कोटी लोक बाहेर काढले' असल्याचा दावा करत, हे लोक नेमके कोण आहेत आणि ते कोणाचे मतदार आहेत, असा सवाल केला. त्यांच्या मते, SIRच्या माध्यमातून मतदारांच्या हक्कावर परिणाम होण्याची शक्यता असल्याने ही प्रक्रिया रद्द झाली पाहिजे.

• दुसरी मागणी: EVM बंद करा, बॅलेट पेपरवर मतदान घ्या

राज ठाकरेंनी दुसरी महत्त्वाची मागणी EVM बंद करून पुन्हा बॅलेट पेपरवर मतदान घेण्याची केली.

'या देशातील व्होटिंग मशीन बंद होऊन बॅलेट पेपरवर यापुढे मतदान झालं पाहिजे,' असं ते म्हणाले. SIR रद्द करणं आणि बॅलेट पेपरवर मतदान या दोन मागण्या पूर्ण झाल्या, तर 'दूध का दूध आणि पाणी का पाणी होईल,' असा दावा त्यांनी केला.

'उद्या कोणाचीही सत्ता येऊ दे, फरक पडत नाही'

आपली लढाई कोणत्या पक्षाला सत्तेत आणण्यासाठी नसून निवडणूक प्रक्रिया योग्य पद्धतीने पार पडावी यासाठी असल्याचं राज ठाकरेंनी स्पष्ट केलं. 'उद्या कोणाचीही सत्ता येऊ दे, काही फरक पडत नाही; पण ती योग्य मार्गाने यावी,' अशी भूमिका त्यांनी मांडली.

त्यामुळे मुंबईतील गर्जना मोर्चातून राज ठाकरेंनी SIR रद्द करणे, EVMऐवजी बॅलेट पेपरवर मतदान आणि निवडणूक प्रक्रियेतील पारदर्शकता हे तीन प्रमुख मुद्दे आक्रमकपणे पुढे आणले आहेत. त्यांच्या या भाषणामुळे निवडणूक आयोग, मतदार यादी आणि EVMचा मुद्दा पुन्हा एकदा महाराष्ट्राच्या राजकीय चर्चेच्या केंद्रस्थानी आला आहे.