भाजप 140 ते 152 जागा जिंकणार, महाराष्ट्रातील इतर एकही पक्ष 50 चा आकडा गाठणार नाही, Exit Poll ची आकडेवारी

संपूर्ण महाराष्ट्राचा अंदाज

राज्यभरातील एकूण आकडेवारी पाहता, भाजप 140 ते 152 नगरपरिषदांमध्ये विजय मिळवू शकतो. शिंदे गट 34 ते 42, अजित पवार गट 24 ते 36 आणि काँग्रेस 24 ते 35 नगरपरिषदांमध्ये आघाडीवर राहू शकतात. शिवसेना (UBT) 3 ते 8 तर शरद पवार गट 4 ते 8 नगरपरिषदांपुरता मर्यादित राहण्याचा अंदाज आहे. विशेष म्हणजे, स्थानिक आघाड्यांना 75 ते 82 नगरपरिषदांमध्ये यश मिळू शकते.

विभागनिहाय चित्र काय सांगते?

विदर्भात काय होणार?

विदर्भात भाजपने एकहाती वर्चस्व प्रस्थापित केल्याचे चित्र आहे. एक्झिट पोलनुसार भाजप 61 जागांवर आघाडीवर असून काँग्रेसला 19 जागा मिळू शकतात. शिंदे गट 7, अजित पवार गट 5 जागांवर समाधान मानू शकतो. शिवसेना (UBT) आणि शरद पवार गटाला फारसे यश मिळताना दिसत नाही. काही ठिकाणी स्थानिक आघाड्या आणि इतर घटक प्रभावी ठरू शकतात.

पश्चिम महाराष्ट्र : साखर पट्ट्यात यंदा चुरशीची लढत अपेक्षित आहे. भाजप 27 जागांवर आघाडीवर असला तरी स्थानिक आघाड्यांना 21 जागा मिळण्याचा अंदाज आहे. अजित पवार गटाला 12 तर शिंदे गटाला 7 जागा मिळू शकतात. काँग्रेस, शिवसेना (UBT) आणि शरद पवार गट येथे मर्यादित प्रभाव दाखवताना दिसत आहेत. अनेक ठिकाणी स्थानिक आघाड्या ‘किंगमेकर’ ठरण्याची शक्यता आहे.

मराठवाडा : मराठवाड्यात भाजपने चांगली मुसंडी मारल्याचे एक्झिट पोल सूचित करतो. भाजप 22 जागांवर आघाडीवर असून अजित पवार गट 9, काँग्रेस 7 आणि शिंदे गट 6 जागांवर पोहोचू शकतात. मराठवाड्यात शिवसेना (UBT) आणि शरद पवार गटाला म्हणावे असे यश मिळणार नसल्याचं चित्र आहे.

उत्तर महाराष्ट्र : उत्तर महाराष्ट्रात भाजपचा प्रभाव ठळक आहे. येथे भाजप 24 जागा जिंकू शकतो, तर शिंदे गट 7 जागांवर समाधान मानू शकतो. अजित पवार गटाला 3 जागा मिळण्याचा अंदाज असून काँग्रेसला शून्य जागा मिळण्याची शक्यता वर्तवली जात आहे. स्थानिक आघाड्यांचा प्रभाव मर्यादित दिसतो.

कोकण : कोकणात भाजप आणि शिवसेना (शिंदे गट) यांच्यात बरोबरीची लढत असल्याचे चित्र आहे. दोन्ही पक्षांना प्रत्येकी 10 जागा मिळण्याचा अंदाज आहे. अजित पवार गट, शरद पवार गट आणि स्थानिक आघाड्यांना काही ठिकाणी यश मिळू शकते, मात्र काँग्रेस आणि शिवसेना (UBT) यांचा प्रभाव नगण्य राहण्याची शक्यता आहे.

भाजप, शिंदे गट आणि अजित पवार गट मिळून बहुसंख्य नगरपरिषदांवर वर्चस्व राखताना दिसत आहेत. अनेक भागांत स्थानिक आघाड्यांकडून कडवी टक्कर मिळत आहे.

काँग्रेस विदर्भात काही अंशी टिकून असली तरी, शिवसेना (UBT) आणि शरद पवार गटाला अपेक्षित यश मिळताना दिसत नाही. एकूणच, एक्झिट पोलनुसार महाराष्ट्राच्या स्थानिक स्वराज्य संस्थांवर भाजपचा झेंडा फडकण्याची शक्यता अधिक असून, निकाल या अंदाजांवर शिक्कामोर्तब करतात का, याकडे सर्वांचे लक्ष लागले आहे.

इतर महत्त्वाच्या बातम्या 

Maharashtra Nagar Parishad and Nagar Panchayat Election Result Live: मतमोजणीआधीच 2 नगर परिषदा आणि एका नगर पंचायतीचा निकाल आला समोर