होम
राजकीय आखाडा
गुन्ह्यांची दुनिया
शहर-खबरबात
राशीभविष्य-धर्म
पैशाची बात
फोटो बाल्कनी
हवामानाचा अंदाज
टॉपिक
Nagar Parishad and Nagar Panchayat Election Exit Poll : महाराष्ट्रातील नगरपरिषद आणि नगरपंचायत निवडणुकांच्या निकालाकडे संपूर्ण राज्याचे लक्ष लागले असतानाच, JDS या संस्थेच्या एक्झिट पोलमधून राजकीय चित्र स्पष्ट होऊ लागले आहे. पश्चिम महाराष्ट्रात शरद पवार गटाचे केवळ दोन नगराध्यक्ष निवडून येणार असल्याचा अंदाज असून, शिवसेना (उद्धव बाळासाहेब ठाकरे) गटाच्या वाट्याला अवघा एक नगराध्यक्ष येण्याची शक्यता व्यक्त करण्यात आली आहे. याउलट भाजप आणि महायुतीचे पारडे राज्यभर जड दिसत आहे. राज्यातील 246 नगरपरिषदा आणि 42 नगरपंचायतींसाठी 20 डिसेंबर रोजी शांततेत मतदान पार पडले. 21 डिसेंबर रोजी निकाल जाहीर होणार असले तरी त्याआधीच एक्झिट पोलने संभाव्य राजकीय समीकरणे मांडली आहेत. या अंदाजानुसार, भारतीय जनता पक्ष राज्यात सर्वाधिक नगरपरिषदांवर विजय मिळवणारा पक्ष ठरू शकतो.
ADVERTISEMENT
पश्चिम महाराष्ट्रात शरद पवारांच्या राष्ट्रवादीला केवळ 2 जागा मिळणार
साखर पट्टा म्हणून ओळखल्या जाणाऱ्या पश्चिम महाराष्ट्रात चुरशीची लढत पाहायला मिळाली आहे. भाजप 27 नगरपरिषदांवर आघाडीवर राहील, असा अंदाज आहे. अजित पवार गटाला 12, तर शिंदे गटाला 7 नगरपरिषदांमध्ये यश मिळू शकते. विशेष म्हणजे, शरद पवार गट फक्त 2 नगराध्यक्षांपुरताच मर्यादित राहील, तर शिवसेना (UBT) गटाला केवळ 1 नगराध्यक्ष मिळण्याची शक्यता आहे. या भागात 21 नगरपरिषदांवर स्थानिक आघाड्या किंगमेकर ठरू शकतात.
राज्यातील चित्र कसं असेल?
संपूर्ण महाराष्ट्राचा विचार करता, भाजप 140 ते 152 नगरपरिषदांवर विजय मिळवू शकतो. शिंदे गट 34 ते 42, अजित पवार गट 24 ते 36, तर काँग्रेस 24 ते 35 नगरपरिषदांमध्ये यश मिळवू शकते. शिवसेना (UBT) आणि शरद पवार गटासाठी मात्र ही निवडणूक अपेक्षाभंग करणारी ठरण्याची शक्यता आहे. एक्झिट पोलमधून स्पष्ट होत असलेले चित्र पाहता, महायुतीचे वर्चस्व, स्थानिक आघाड्यांची ताकद आणि विरोधकांची मर्यादित कामगिरी हे या निवडणुकीचे ठळक वैशिष्ट्य ठरण्याची चिन्हे आहेत.
विदर्भात भाजपचे वर्चस्व, 61 जागा निवडून येण्याचा अंदाज
विदर्भात भाजपने एकहाती मुसंडी मारल्याचे चित्र एक्झिट पोलमधून समोर आले आहे. या विभागात भाजपला तब्बल 61 नगरपरिषदांमध्ये यश मिळण्याचा अंदाज आहे. काँग्रेस 19 जागांवर तग धरताना दिसत असली, तरी शरद पवार गटाला येथे एकही नगराध्यक्ष मिळणार नसल्याचा अंदाज व्यक्त करण्यात आला आहे. शिंदे गट 7, अजित पवार गट 5, तर स्थानिक आघाड्या 3 जागांवर विजय मिळवू शकतात.
मराठवाड्यातही भाजपचं वर्चस्व
मराठवाड्यातही भाजपने आघाडी घेतल्याचे चित्र आहे. येथे भारतीय जनता पक्ष 22 नगरपरिषदांवर विजय मिळवू शकतो. अजित पवार गट 9, काँग्रेस 7, तर शिंदे गट 6 नगरपरिषदांवर यशस्वी होण्याचा अंदाज आहे. शिवसेना (UBT) 3 आणि शरद पवार गट फक्त 1 नगराध्यक्ष निवडून आणू शकतो.
कोकणात भाजप आणि शिंदे गटाला प्रत्येक 10 जागा मिळण्याची शक्यता
उत्तर महाराष्ट्रात भाजपला सर्वाधिक 24 नगरपरिषदांमध्ये विजय मिळण्याची शक्यता असून, शिंदे गट 7 जागांवर समाधान मानू शकतो. कोकणात मात्र भाजप आणि शिंदे गटात बरोबरीची लढत दिसत असून, दोन्ही पक्षांना प्रत्येकी 10 नगरपरिषदा मिळण्याचा अंदाज आहे.
इतर महत्त्वाच्या बातम्या
ADVERTISEMENT
