पुणे महानगरपालिका : विधानसभा निवडणुकीमध्ये चंद्रकांत पाटलांना नडणाऱ्या अमोल बालवडकर यांचा पत्ता कट

चंद्रकांत पाटलांना नडणाऱ्या अमोल बालवडकर यांचा पत्ता कट  

विधानसभा निवडणुकीत कोथरूड मतदारसंघातून भाजपची उमेदवारी मिळावी, यासाठी अमोल बालवडकर यांनी जोरदार शड्डू ठोकला होता. आपण स्थानिक असून कार्यकर्त्यांचा पाठिंबा आपल्या पाठीशी असल्याचा दावा करत त्यांनी थेट चंद्रकांत पाटील यांना कडाडून विरोध केला होता. उमेदवारीच्या मागणीसाठी मोर्चे, बैठकांमधील आक्रमक भूमिका आणि सार्वजनिक नाराजी यामुळे हा वाद चिघळला होता. परिस्थिती इतकी गंभीर झाली होती की, या प्रकरणात थेट मुख्यमंत्री देवेंद्र फडणवीस यांनाही हस्तक्षेप करावा लागला होता.

अखेर पक्षशिस्त आणि वरिष्ठांच्या आदेशानंतर अमोल बालवडकर यांनी विधानसभा निवडणुकीच्या रिंगणातून माघार घेतली होती. मात्र, त्यानंतरही त्यांनी चंद्रकांत पाटील यांच्यासाठी आणि भाजपसाठी प्रामाणिकपणे काम केलं का, याबाबत पक्षांतर्गत वर्तुळात प्रश्नचिन्ह उपस्थित करण्यात आले होते. काही नेत्यांच्या मते, या नाराजीचा आणि बंडखोरीच्या सूरांचा फटका अमोल बालवडकर यांना दीर्घकाळ बसू शकतो, अशी चर्चा त्याचवेळी सुरू झाली होती.

आता पुणे महानगरपालिकेच्या निवडणुकीत भाजपकडून उमेदवारांची यादी जाहीर होत असताना, अमोल बालवडकर यांचे नाव त्यात आलेले नाही. उलट, लहू बालवडकर यांना भाजपची अधिकृत उमेदवारी देण्यात आली आहे. यामुळे विधानसभा निवडणुकीत चंद्रकांत पाटील यांना नडणाऱ्या आणि स्वतंत्र भूमिका घेणाऱ्या कार्यकर्त्याचा ‘पत्ता कट’ महापालिका निवडणुकीतच करण्यात आल्याचे चित्र स्पष्ट झाले आहे.

भाजपच्या या निर्णयाकडे पक्षशिस्त, नेतृत्वाशी निष्ठा आणि संघटनात्मक एकसूत्रता या निकषांवरून पाहिले जात आहे. उघड नाराजी आणि नेतृत्वाला थेट आव्हान देणाऱ्या भूमिकेचा फटका कसा बसतो, याचे अमोल बालवडकर यांचे प्रकरण ठळक उदाहरण मानले जात आहे. आगामी काळात अमोल बालवडकर कोणती भूमिका घेतात, पुन्हा सक्रिय होतात की राजकीय माघारच घेतात, याकडे पुण्यातील राजकीय वर्तुळाचे लक्ष लागले आहे.

इतर महत्त्वाच्या बातम्या

 हॉटेल मालकावर पोलिसांना बोलवण्याची वेळ, निलम गोऱ्हेंसमोर भांडणं, AB फॉर्म वाटताना पुण्यात शिंदेसेनेत मोठा गोंधळ