अजित डोवाल यांचा गौरव

या विशेष कार्यक्रमात देशाचे राष्ट्रीय सुरक्षा सल्लागार अजित डोवाल यांना 2026 चा मानाचा 'लोकमान्य टिळक पुरस्कार' गृहमंत्री अमित शाह यांच्या हस्ते प्रदान करण्यात आला. या सोहळ्याला राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि सुनेत्रा पवार यांच्यासह अनेक मान्यवर उपस्थित होते. देशाच्या सुरक्षेत अजित डोवाल यांचे योगदान अतुलनीय असल्याचे सांगत शाह यांनी त्यांचा गौरव केला.

हे ही वाचा : मोदींचं कौतुक करणारे विवेक ओबेरॉय अन् आर माधवन राहायला दुबईत, राज ठाकरेंनी सगळंच काढलं

सांस्कृतिक राष्ट्रवादाबद्दल काय म्हणाले?

लोकमान्य टिळकांच्या विचारांवर प्रकाश टाकताना शाह यांनी सांस्कृतिक राष्ट्रवादाच्या संकल्पनेवर विशेष भर दिला. "टिळकांनी भारताच्या स्वातंत्र्य आंदोलनाला सांस्कृतिक राष्ट्रवादाची जोड दिली. त्यांनी सुरू केलेले गणेशोत्सव आणि शिवजयंती उत्सव हे केवळ धार्मिक वा सामाजिक उपक्रम नव्हते, तर त्यातून राष्ट्रवादाला सांस्कृतिक राष्ट्रवादात बदलण्याचे महान कार्य त्यांनी केले," असे शाह म्हणाले.

हे ही वाचा : "मला चंद्रकांत पाटलांच्या मेंदूवरील फिंगरप्रिंट्स बघायचेत", राज ठाकरेंनी तंत्रशिक्षण मंत्र्यांची काढली पिसं

'आता देश मागे येऊ शकत नाही'

पुढे बोलताना अमित शाह म्हणाले की, लोकमान्य टिळकांनी त्या काळी दाखवलेली दूरदृष्टी आज प्रत्यक्षात येत आहे. आज भारत देश सांस्कृतिक राष्ट्रवादाच्या मार्गावर वेगाने पुढे जात आहे. आता या प्रवासाला कुणीही रोखू शकत नाही किंवा मागे नेऊ शकत नाही; देश याच विचारांच्या दिशेने वाटचाल करत राहील, असा ठाम विश्वासही त्यांनी यावेळी व्यक्त केला.