राहुल-प्रियंका गांधींना पोलिसांनी घेतलं ताब्यात, आकाशवाणी भवनबाहेर तुफान राडा

या कारवाईदरम्यान आंदोलनस्थळी मोठा गोंधळ निर्माण झाला. पोलिसांनी आंदोलनकर्त्या नेत्यांना हटवण्यास सुरुवात केली आणि त्यानंतर अनेक नेत्यांना डिटेन करण्यात आले. काँग्रेस कार्यकर्त्यांनीही मोठ्या संख्येने आकाशवाणी भवनाबाहेर जमून घोषणाबाजी केली.

निवडणूक आयोगाकडे जाण्याचा प्रयत्न

राहुल गांधी आणि विरोधी पक्षांचे खासदार संसदेतून निवडणूक आयोगाच्या कार्यालयाकडे मोर्चा घेऊन निघाले होते. राहुल गांधी यांच्या म्हणण्यानुसार, 300 हून अधिक विरोधी खासदार निवडणूक आयुक्तांची भेट घेऊ इच्छित होते. हे खासदार कोट्यवधी भारतीयांचे प्रतिनिधित्व करतात, मग निवडणूक आयुक्त त्यांना भेटण्यास का तयार नाहीत, असा सवाल त्यांनी उपस्थित केला.

हे ही वाचा>> राहुल गांधींची सरकारविरोधात रस्त्यावरची लढाई; बॅरिकेडवर चढून फडकावला तिरंगा...

राहुल गांधी यांनी असेही म्हटले की, खासदार फक्त निवडणूक आयोगाला भेटून, “मतांची चोरी झाली आहे,” असे सांगू इच्छित होते. निवडणूक आयोगाला भेटण्यासाठी आम्ही जाऊच आणि आयोगाला आम्हाला भेटावेच लागेल, असा दावा त्यांनी केला.

आकाशवाणी भवनाच्या गेटवर अडवले

राहुल गांधी आकाशवाणी भवनाच्या मार्गाने निवडणूक आयोगाच्या कार्यालयाकडे जाण्याचा प्रयत्न करत होते. मात्र, पोलिसांनी त्यांना गेटवरच रोखले. त्यानंतर राहुल गांधी, प्रियंका गांधी आणि के. सी. वेणुगोपाल हे निवडणूक आयोगाच्या कार्यालयापासून सुमारे 200 मीटर अंतरावर ठिय्या आंदोलनाला बसले.

हे ही वाचा>> राहुल गांधी बॅरिकेडवर चढले, प्रियांका गांधी पोलिसांच्या ताब्यात; निवडणूक आयोगाच्या कार्यालयाजवळ राडा

राहुल गांधी यांनी सांगितले की, त्यांना येथे बसण्यात कोणतीही अडचण नाही आणि जितका वेळ बसावे लागेल तितका वेळ ते बसतील. जर निवडणूक आयोगाला येथे बसणे मान्य नसेल, तर दिल्लीतील कोणतीही जागा सांगावी, आम्ही तिथे आंदोलन करू, असेही त्यांनी म्हटले.

निवडणूक आयोगाचे स्पष्टीकरण

निवडणूक आयोगाच्या सूत्रांच्या हवाल्याने असे सांगण्यात आले की, काँग्रेस पक्षाकडून किंवा इतर कोणत्याही विरोधी पक्षाकडून बैठकीसाठी कोणतीही अधिकृत विनंती आयोगाला प्राप्त झालेली नाही. त्यामुळे विरोधी खासदारांच्या भेटीसंदर्भात कोणतेही नियोजन झाले नव्हते, असे आयोगाच्या सूत्रांनी स्पष्ट केले.

मोठा पोलीस बंदोबस्त

आकाशवाणी भवन परिसरात मोठ्या प्रमाणात पोलीस बंदोबस्त तैनात करण्यात आला होता. दिल्ली पोलिसांनी आकाशवाणी भवनाच्या मागील गेटजवळील मार्गावर बॅरिकेड लावून निर्वाचन सदनाकडे जाणारा रस्ता बंद केला होता. बॅरिकेडजवळ मोठ्या संख्येने पोलीस तैनात करण्यात आले होते.

NSUI आणि इंडियन यूथ काँग्रेसचे कार्यकर्तेही आंदोलनस्थळी पोहोचले होते. यापैकी काही कार्यकर्त्यांनाही पोलिसांनी ताब्यात घेतल्याची माहिती आहे.

दरम्यान, विरोधक हे आंदोलन मतदार यादी आणि निवडणूक प्रक्रियेतील पारदर्शकतेसाठी असल्याचे सांगत आहेत. दुसरीकडे, निवडणूक आयोगाने बैठकीसाठी कोणतीही विनंती प्राप्त झालेली नसल्याचे स्पष्ट केले आहे. त्यामुळे या आंदोलनावरून राजकीय वातावरण आणखी तापण्याची चिन्हे दिसत आहेत.