Rahuri Bypoll Survey: एक फोन किंगमेकर! पण राहुरीतली टशन संपलेली नाही, तसं झालं तर गेम फिरणार!

आता इथं भाजपचे अक्षय कर्डिले विरुद्ध राष्ट्रवादी काँग्रेस (शरदचंद्र पवार) चे गोविंद मोकाटे, अपक्ष रावसाहेब खेवरे आणि वंचितचे संतोष चोळके यांच्यात मुख्य लढत होत आहे. आता तनपुरेंच्या माघारीनं इथलं गणित भाजपसाठी सोपं झालंय का? तर आजिबात नाही. मग इथं नक्की काय होणार, कर्डिलेंना कुणामुळं फटका बसू शकतो आणि निवडणूक कुणामुळं फिरु शकते यासंदर्भात पोलपंडित या सर्व्हे करणाऱ्या संस्थेनं तिथं फिरुन काढलेली काही महत्त्वाची निरीक्षणं आणि अंदाज आपण पाहूया. 

राहुरी पोटनिवडणुकीतील प्रमुख उमेदवार:

1. अक्षय कर्डिले - भाजप (BJP)
2. गोविंद मोकाटे - राष्ट्रवादी काँग्रेस (शरदचंद्र पवार)
3. रावसाहेब खेवरे - अपक्ष (माजी शिवसेना ठाकरे गट जिल्हाप्रमुख)
4. संतोष चोळके - वंचित बहुजन आघाडी (VBA)

तर असं आहे की, अक्षय कर्डिले हे मतदारसंघातील अहिल्यानगर तालुक्यातील जेऊर जिल्हा परिषद गटातून येतात. 2024 विधानसभेत दिवंगत आमदार शिवाजी कर्डिले यांना अहिल्यानगर तालुक्यातून तब्बल 21,700 मतांची आघाडी मिळाली होती. 2019 मध्ये त्यांचा पराभव झाला असताना देखील त्यांना अहिल्यानगर तालुक्यातून 15,175 इतके मताधिक्य होते. राष्ट्रवादी काँग्रेस (अजित पवार) पक्षाचे अहिल्यानगरचे आमदार संग्राम जगताप यांचा देखील तालुक्यात प्रभाव असून, त्यांनी कर्डिले यांच्या प्रचारात सक्रिय सहभाग घेतला आहे. मात्र गोविंद मोकाटे देखील जेऊर गटातून येतात. अहिल्यानगर तालुक्यात त्यांचा सुद्धा जनसंपर्क आहे. त्यांच्या कन्या भाग्यश्री मोकाटे जेऊर जिल्हा परिषद गटाच्या सदस्य राहिलेल्या आहेत. यामुळे या निवडणुकीत मोकाटे हे कर्डिले यांना त्यांच्या होम पीचवर थेट आव्हान देणार आहेत.

हे ही वाचा>> बारामती अन् राहुरीसह चार राज्यांच्या विधानसभा निवडणुकांची घोषणा, मतदान ते मतमोजणी प्रत्येक तारीख एका क्लिकवर

तिकडे पाथर्डी तालुक्यातील मीरी आणि तिसगाव जिल्हा परिषद गटांमध्ये कर्डिले यांना मतदारांचा पाठिंबा राहिला आहे. भाजप आमदार मोनिका राजळे यांच्या वृद्धेश्वर सहकारी साखर कारखान्याचा कर्मचारी वर्ग, ऊस उत्पादक शेतकरी आणि कार्यकर्त्यांचा गट या भागात सक्रीय असून त्यांचा अक्षय कर्डिले यांना पाठिंबा आहे. यामुळे या निवडणुकीत देखील पाथर्डी तालुक्यातील मतदारांचा कल भाजप उमेदवार अक्षय कर्डिले यांच्याकडे अधिक असण्याची शक्यता आहे.

राहुरी तालुक्यात अंदाजे 1,95,926 मतदार आहेत. मतदारसंघातील उर्वरीत दोन तालुक्यांऐवजी सर्वाधिक मतदार हे राहुरी तालुक्यात आहेत. पालकमंत्री राधाकृष्ण विखे पाटील यांचा राहुरी तालुक्यात प्रभाव असून ते कर्डिले यांच्या प्रचारात सक्रिय आहेत. कर्डिले यांच्यासाठी ही जमेची बाजू ठरते आहे.

अपक्ष उमेदवार रावसाहेब खेवरे हे शिवसेना (ठाकरे गट) चे माजी जिल्हाप्रमुख असून ते राहुरी तालुक्यातून येतात. प्राजक्त तनपुरे यांनी निवडणुकीतून घेतलेली माघार आणि गोविंद मोकाटे यांचा राहुरी तालुक्यात असणारा मर्यादित जनसंपर्क, यामुळे तालुक्यातील स्थानिक उमेदवार म्हणून खेवरे यांना राहुरीतील मतदारांचा चांगला प्रतिसाद मिळू शकतो.

हे ही वाचा>> सुषमा अंधारेंची विधानपरिषदेसाठी रश्मी ठाकरेंकडे फिल्डिंग? मातोश्रीवर इच्छुकांची भाऊगर्दी, कोणाला मिळणार संधी?

रावसाहेब खेवरे आणि मोकाटे यांच्यात राहुरी तालुक्यातील भाजपविरोधी मतांचे विभाजन होण्याची शक्यता आहे, ज्याचा थेट फायदा अक्षय कर्डिले यांना होऊ शकतो. 

आता मतदारसंघातली सर्वात महत्त्वाची बाजू बघा. माजी खासदार तथा आमदार प्रसाद तनपुरे यांनी उभारलेले संस्थांचे जाळे आणि प्राजक्त तनपुरे यांनी आमदार असताना राहुरी तालुक्यात केलेली विकासकामे यामुळे तालुक्यात त्यांचा मोठा जनाधार आहे.

2024 विधानसभा वगळता मागील दोन्ही निवडणुकांमध्ये प्राजक्त तनपुरे यांनी राहुरी तालुक्यातून निर्णायक आघाडी घेतली आहे. सद्यस्थितीत त्यांची भूमिका स्पष्ट नसली तरी निवडणुकीच्या अंतिम टप्प्यात त्यांचे समर्थक कार्यकर्ते काय भूमिका घेतात, यावरच राहुरीचा निकाल अवलंबून असणार आहे.

पोल पंडित ही निवडणुकांचे सर्वेक्षण करणारी संस्था आहे. पोल पंडितकडून निवडणुकांचे एक्झिट पोल आणि ओपिनियन पोल दिले जातात.