सोलापूर महानगरपालिका : ज्यांच्यावर विश्वास टाकला, त्याच महिला नेत्याने प्रणिती शिंदेंना दगा दिला

काँग्रेसकडून उमेदवारी मिळूनही फिरदोस पटेल यांचा AIMIM मध्ये प्रवेश 

महाविकास आघाडीची सोलापुरात बैठक सुरू असतानाच प्रदेश पातळीवरून सोलापूर महानगरपालिकेच्या 20 उमेदवारांची यादी जाहीर करण्यात आली होती. या यादीत प्रभाग क्रमांक 16 मधून फिरदोस पटेल यांच्यासह सीमा यलगुलवार आणि नर्सिंग कोळी यांची नावे काँग्रेसकडून जाहीर करण्यात आली होती. फिरदोस पटेल या प्रणिती शिंदे यांच्या निकटवर्तीय म्हणून ओळखल्या जात होत्या. मात्र रविवारी (28 डिसेंबर) फिरदोस पटेल यांनी AIMIMच्या वरिष्ठ नेत्यांची भेट घेत प्रभाग 16 मधून उमेदवारीची मागणी केली. हा प्रभाग मुस्लिम बहुसंख्याक असल्याने AIMIMकडून त्यांना उमेदवारी मिळण्याची शक्यता जवळपास निश्चित मानली जात आहे. त्यानंतर त्यांनी अधिकृतपणे AIMIM मध्ये प्रवेश केल्याची घोषणा केली.

हेही वाचा : मुंबई महानगरपालिकेसाठी भाजपची पहिली उमेदवार यादी, नवनाथ बन ते नील सोमय्या कोणा-कोणाला संधी?

फिरदोस पटेल प्रतिक्रिया देताना काय म्हणाल्या? 

या निर्णयाबाबत प्रतिक्रिया देताना फिरदोस पटेल यांनी काँग्रेस पक्षात आपल्याला सन्मानाची वागणूक मिळत नसल्याची नाराजी व्यक्त केली. पक्षात सातत्याने संशयाच्या नजरेने पाहिले जात होते, त्यामुळेच काँग्रेस सोडून AIMIMकडून निवडणूक लढवण्याचा निर्णय घेतल्याचे त्यांनी स्पष्ट केले.

फिरदोस पटेल या काँग्रेसकडून दोन वेळा नगरसेविका म्हणून निवडून आल्या आहेत. प्रणिती शिंदे आमदार असताना तसेच विधानसभा निवडणुकीच्या काळात फिरदोस पटेल आणि त्यांच्या समर्थकांनी त्यांच्यासाठी महत्त्वाची भूमिका बजावली होती. 2024 च्या लोकसभा निवडणुकीतही त्यांनी अहोरात्र मेहनत घेतली होती. मात्र विधानसभा निवडणुकीच्या काळात परिस्थिती बदलू लागली. फिरदोस पटेल यांचे नातेवाईक शौकत पठाण यांनी AIMIMमध्ये प्रवेश केल्यानंतर त्यांच्याकडे काँग्रेसमध्ये संशयाच्या नजरेने पाहिले जाऊ लागले. याच पार्श्वभूमीवर आपण पक्ष सोडण्याचा निर्णय घेतल्याचे फिरदोस पटेल यांनी सांगितले आहे.

इतर महत्त्वाच्या बातम्या 

मुंबई महानगरपालिका : ठाकरेंची पहिली उमेदवार यादी, सुनील प्रभू आणि विनायक राऊतांच्या मुलाला मैदानात उतरवलं