संग्राम जगतापांच्या पीएची दहशत? अंधारेंनी व्हिडीओ बाहेर काढला! 'विरोधी उमेदवाराला बंदुक दाखवली...'

सुषमा अंधारे यांनी आपल्या पोस्टमध्ये स्पष्टपणे नमूद केलं आहे की, “आमदार संग्राम जगताप सोबत नसताना त्यांचे स्वीय सहाय्यक आणि बॉडीगार्ड हे समोरच्या पक्षातील नगरसेवक पदाच्या उमेदवाराच्या घराबाहेर रिव्हॉल्वर घेऊन उभे आहेत.” या प्रकारामुळे नगर शहरात दहशतीचे वातावरण निर्माण झाल्याचा आरोपही त्यांनी केला आहे. निवडणुकीच्या पार्श्वभूमीवर अशा प्रकारे बंदूक दाखवून धमकावण्याचा प्रकार अत्यंत गंभीर असल्याचं अंधारे यांनी म्हटलं आहे.

या प्रकरणात आणखी गंभीर बाब म्हणजे संबंधित ठिकाणी पोलिसांकडूनही बंदुकीच्या माध्यमातून दडपशाही केली जात असल्याचा दावा सुषमा अंधारे यांनी केला आहे. रामदास वाणी यांच्या जागेवर हा प्रकार घडल्याचा उल्लेख करत त्यांनी प्रशासनावरही प्रश्नचिन्ह उपस्थित केलं आहे. या आरोपांमुळे राजकीय वर्तुळात तीव्र प्रतिक्रिया उमटत असून नगर जिल्ह्यात मोठी खळबळ उडाली आहे.

पोलिसांकडून चौकशी केली जाणार असल्याची माहिती

दरम्यान, या संपूर्ण प्रकरणावर जिल्हा पोलीस अधीक्षक सोमनाथ घार्गे यांनी प्रतिक्रिया दिली आहे. पत्रकारांशी बोलताना घार्गे यांनी सांगितलं की, आमदार संग्राम जगताप यांच्या स्वीय सहाय्यकाशी संबंधित व्हिडीओप्रकरणी सखोल चौकशी केली जाणार असून, सत्य समोर आल्यानंतर निश्चितपणे योग्य ती कारवाई केली जाईल. कोणालाही कायदा हातात घेण्याची परवानगी दिली जाणार नाही, असंही त्यांनी स्पष्ट केलं.

पोलीस अधीक्षक घार्गे पुढे म्हणाले, “रामदास वाणी यांची याबाबत नेमकी काय तक्रार आहे, हे आधी जाणून घेतलं जाईल. संबंधित प्रकरणातील सर्व बाबींची सखोल चौकशी केली जाईल. व्हिडिओमध्ये करण्यात आलेल्या आरोपांमध्ये तथ्य आहे की नाही, याची पडताळणी केल्यानंतर आवश्यक ती कायदेशीर कारवाई करण्यात येईल.” त्यामुळे आता पोलीस तपासातून काय निष्पन्न होतं, याकडे संपूर्ण जिल्ह्याचं लक्ष लागलं आहे.

इतर महत्त्वाच्या बातम्या 

रवींद्र चव्हाण म्हणाले, लातूरमधून विलासरावांच्या आठवणी पुसल्या जातील, रितेश देशमुखची 3 वाक्यात भावुक प्रतिक्रिया