Virat Kohli Sachin Tendulkar : कोहलीला सचिन म्हणाला, “मला 365 दिवस लागले, पण तू…”

Sachin Tendulkar Reaction on Virat Kohli 49th century : तब्बल तीन वेळा उंबरठ्यावर पोहोचूनही विराट कोहलीला शतकाने हुलकावणी दिली. पण, दक्षिण आफ्रिकेविरुद्ध अखेर कोहलीने शतक झळकावलं आणि सचिन तेंडुलकरच्या विश्वविक्रमाची बरोबरी केली. त्याने 49वे शतक झळकावल्यानंतर सचिन तेंडुलकरने त्यांच्या कामगिरीचे कौतुक केले.

विश्वचषक स्पर्धेत जबरदस्त फार्मात असलेल्या विराटने रविवारी (5 नोव्हेंबर) आपला 35 वा वाढदिवस खास स्टाईलमध्ये साजरा केला. कोलकात्याच्या ईडन गार्डन्स मैदानावर भारत आणि दक्षिण आफ्रिका यांच्यात सामना झाला. या सामन्यात कोहलीने कारकिर्दीतील 49 वे शतक झळकावून इतिहास रचला. वनडेमध्ये सर्वाधिक शतके झळकावण्याच्या बाबतीत त्याने सचिनच्या (49 शतके) ऐतिहासिक विक्रमाची बरोबरी केली.

कोहलीने 277 व्या डावात झळकावले 49 वे शतक

कोहलीने कारकिर्दीतील 277व्या वनडे इनिंगमध्ये हे झंझावाती शतक झळकावले. तर सचिनने आपल्या 451व्या डावात ही कामगिरी केली होती. या सामन्यात कोहलीने 121 चेंडूत 101 धावांची नाबाद खेळी केली. त्याने 10 चौकार मारले. सचिन तेंडुलकरसह क्रीडा, राजकारण आणि चित्रपट जगतातील दिग्गजांही कोहलीच्या या कामगिरीवर फिदा झाले.

कोहली 49 शतकांच्या विक्रमाशी बरोबरी केल्यानंतर सचिनने त्याचे कौतुक केले आणि हा विक्रम मोडल्याबद्दल त्याला शुभेच्छाही दिल्या. सचिन म्हणाला की, मला आशा आहे की तू लवकरच 49 वरून 50 जाशील आणि पुढील काही दिवसांत माझा हा विक्रम मोडीत काढशील.

कोहलीच्या खेळीचे सर्वच स्तरातून कौतुक

सचिनने आपल्या सोशल मीडिया पोस्टमध्ये लिहिले की, “विराट चांगला खेळलास. या वर्षाच्या सुरुवातीला 49 वरून 50 वर जाण्यासाठी मला 365 दिवस लागले (सचिन एप्रिलमध्ये ५० वर्षांचा झाला). मला आशा आहे की येत्या काही दिवसात तू 49 ते 50 (शतके) पूर्ण करशील आणि माझा विक्रम मोडीत काढशील. अभिनंदन!!”

सचिनशिवाय हरभजन सिंग आणि अफगाणिस्तानचा स्टार रशीद खान यांनीही कोहलीचे अभिनंदन केले. क्रीडा मंत्री अनुराग ठाकूर आणि काँग्रेस नेते पी. चिदंबरम यांनीही सोशल मीडिया पोस्टद्वारे कोहलीचं कौतुक केलं. चित्रपटसृष्टीतील स्टार कलाकार प्रकाश राज यांनीही कोहलीचे अभिनंदन केले. याशिवाय चाहते आणि अनेक दिग्गजांनी पोस्ट शेअर करून कोहलीच्या कामगिरीचे कौतुक केले आहे.

सचिनने आपल्या कारकिर्दीत 463 एकदिवसीय सामने खेळले, ज्यात त्याने 452 डावांमध्ये 44.83 च्या सरासरीने 18426 धावा केल्या. त्याने एकूण 49 एकदिवसीय शतके झळकावली. सचिन आणि कोहलीने एकदिवसीय आंतरराष्ट्रीय क्रिकेटमध्ये सर्वाधिक 49-49 शतके झळकावली आहेत. त्यांच्यानंतर रोहित शर्मा (31) दुसऱ्या स्थानावर आहे. म्हणजे एकदिवसीय आंतरराष्ट्रीय क्रिकेटमध्ये सर्वाधिक शतके झळकावणारे टॉप-3 फलंदाज हे भारतीय आहेत.

एकदिवसीय सामन्यात सर्वाधिक शतके करणारे खेळाडू

सचिन तेंडुलकर – 452 डाव – 49 शतके
विराट कोहली – 277 डाव – 49 शतके
रोहित शर्मा – 251 डाव – 31 शतके
रिकी पाँटिंग – 365 डाव – 30 शतके
सनथ जयसूर्या – 433 डाव – 28 शतके