पैसा-पाणी: एलॉन मस्कची डोकेदुखी वाढली... Tesla च्या नफ्यात घट, ट्रम्प यांच्यासाठी काम करणं पडलं महागात!
अमेरिकेचे राष्ट्राध्यक्ष डोनाल्ड ट्रम्प यांना पुन्हा सत्तेत आणण्यात उद्योजक एलॉन मस्क यांचा मोठा वाटा आहे. पण हे सगळं राजकारण करत असताना एलॉन मस्क यांचं आता बरंच आर्थिक नुकसान झालं आहे.
एलॉन मस्क हे जगातील सर्वात श्रीमंत व्यक्ती आहेत. गेल्या नोव्हेंबरमध्ये डोनाल्ड ट्रम्प अमेरिकेचे अध्यक्ष झाले आणि मस्कची ताकद आणखी वाढली. पैसा आणि सत्ता दोन्ही त्यांच्या मुठीत होत्या. त्यांच्या कंपन्यांचे शेअर विक्रमी उंचीवर पोहोचले होते. पण पाच महिन्यांतच चित्र बदललं आहे. Teslaची विक्री घटत आहे, नफाही कमी होत आहे, आणि शेअरही घसरत आहेत. तेव्हा जाऊन मस्क यांनी सांगितले की ते अमेरिकन सरकारसाठी कमी काम करतील आणि Teslaकडे जास्त लक्ष देतील.
तंत्रज्ञानाच्या क्षेत्रात मस्क यांचे काम अफलातून आहे. हेच त्यांच्या श्रीमंतीचे मूळ कारण आहे. त्यांच्या व्यवसायामागे एक विचार आहे. आपल्या पृथ्वीबद्दलची काळजी. त्यांना वाटतं की पृथ्वी नष्ट होऊ शकते आणि त्यामुळे पेट्रोल-डिझेलचा वापर थांबवायला हवा. याच विचारातून Tesla या विजेवर चालणाऱ्या कार तयार झाल्या.
टॅरिफवरुन मस्क आणि ट्रम्पमध्ये मतभेद?
त्याचबरोबर, जर पृथ्वी नष्ट झालीच तर माणसांना दुसऱ्या ग्रहावर राहण्याची तयारी असावी, असेही त्यांचे मत आहे. अंतराळात जाण्याचं काम सरकारचं होतं, पण मस्क यांनी SpaceXच्या माध्यमातून खाजगी क्षेत्रातून पाऊल टाकलं. आधी रॉकेट एकदा उड्डाण केल्यावर निकामी होत होतं, पण SpaceXने असे रॉकेट बनवले जे विमानासारखे परत वापरता येऊ शकतात. रॉकेट जमिनीवर उतरवायचं आणि परत वापरायचं.
मस्क यांच्या काही कल्पना ट्रम्प यांच्या राजकारणाशी धडकतात. ट्रम्पना हवामान बदलावर विश्वास नाही, उलट त्यांनी कोळशाच्या वापरावर असलेल्या बंदी उठवल्या. डेमोक्रॅट्स आणि लिबरल लोक Tesla सारख्या गाड्या विकत घेत होते. पण मस्क यांनी ट्रम्प यांना समर्थन दिलं आणि त्यामुळे Teslaच्या गाड्यांना आग लावण्यासारख्या घटना घडल्या. टॅरिफ्सबाबतही मस्क सहमत नाहीत. जगभरात Teslaच्या गाड्यांचे पार्ट्स वेगवेगळ्या देशांमधून येतात. टॅरिफ वॉरमुळे त्यांच्या पुरवठा साखळीवर परिणाम होण्याची भीती आहे.
चीनच्या BYD कंपनीकडून Teslaला मोठं आव्हान
या सगळ्याच्या दरम्यान, चीनच्या BYD कंपनीकडून Teslaला मोठं आव्हान मिळत आहे. 2024 मध्ये BYDने पहिल्यांदा Teslaपेक्षा जास्त इलेक्ट्रिक कार विकल्या. BYDने 43 लाख तर Teslaने फक्त 18 लाख कारची विक्री केली. तंत्रज्ञानाच्या बाबतीतही BYD पुढे जात आहे. BYD अशी टेक्नॉलॉजी विकसित करत आहे. ज्या पाच मिनिटांच्या चार्जमध्ये गाडी 450 किलोमीटर जाऊ शकते, तर Tesla अजूनही 15 मिनिटांच्या चार्जमध्ये 250 किलोमीटर पर्यंतच मर्यादित आहे. Teslaच्या ताज्या निकालानुसार त्यांची विक्री आणि नफा दोन्ही घटले आहेत.
अशा परिस्थितीत मस्क यांनी सांगितले की, आता ते आठवड्यातून फक्त एक किंवा दोन दिवस सरकारसाठी काम करतील. ट्रम्प राष्ट्राध्यक्ष झाल्यानंतर त्यांनी DOGE म्हणजेच Department of Government Efficiencyसाठी काम करायला सुरुवात केली होती. उद्दिष्ट होतं, एक ट्रिलियन डॉलर्सची बचत. पण प्रत्यक्षात ते शक्य झालं नाही. एक ट्रिलियनचा टार्गेट आता 150 अब्ज डॉलर्सवर आणला आहे आणि तोही अजून पूर्ण होताना दिसत नाही. त्यामुळे मस्क आता हे सगळं बाजूला ठेवून पुन्हा व्यवसायावर लक्ष केंद्रित करणार आहेत.
पैसा-पाणी या विशेष सदरातील इतर महत्त्वाचे ब्लॉग वाचा
1. पैसा-पाणी: UPI वारंवार का होतं डाऊन?, पैसा हेच कारण!
2. पैसा-पाणी: बॉन्ड बाजाराच्या दबावामुळे माघार, डोनाल्ड ट्रम्प यांनी म्हणून घेतला यू-टर्न?
3. पैसा-पाणी : संकटात संधी! ट्रंप यांच्या टॅरिफ धोरणामुळे भारतासाठी नवे दरवाजे उघडण्याची शक्यता
4. पैसा-पाणी: भारतीयांना सोन्याचं व्यसन, सरकारने मानली हार.. 3 मोठ्या योजना अपयशी!
हे वाचलं का?
