नागपुरात ‘शिंदे पॅटर्न’ थोडक्यात हुकला! कंभालेंचं बंड अपयशी, काँग्रेसनं राखली सत्ता

नागपूर जिल्हा परिषदेच्या अध्यक्ष आणि उपाध्यक्ष पदाच्या निवडणुकीपूर्वी घडलेल्या राजकीय घडामोडींमुळे सत्तांतर होणार की काँग्रेसची सत्ता कायम राहणार याची सगळ्यांना उत्सुकता होती. काँग्रेसनं सत्ता राखली. दरम्यान, या निवडणुकीच्या निमित्ताने राज्यातल्या शिंदे पॅटर्नची पुनरावृत्ती नागपुरात होणार होती, ती थोडक्यात हुकली आहे.

नागपूर जिल्हा परिषदेच्या निवडणुकीत काँग्रेसला सत्ता राखण्यात यश आलंय. जिल्हा परिषद अध्यक्ष आणि उपाध्यक्ष पदाच्या निवडणुकीत काँग्रेसच्या मुक्ता कोकड्डे या अध्यक्षपदी विजयी झाल्या. तर कुंदा राऊत उपाध्यक्ष म्हणून निवडून आल्या आहेत.

भाजपच्या पडद्यामागून हालचाली, नाना कंभालेंचं बंड

जिल्हा परिषद अध्यक्ष व उपाध्यक्ष निवडणुकीच्या निमित्तांनं सत्तांतर घडवून आणण्यासाठी भाजपचे पडद्यामागून प्रयत्न सुरू होते. काँग्रेसचे ज्येष्ठ नेते नाना कंभाले यांनी निवडणुकीत बंडाचं निशाण फडकावलं होतं.