अशोक खरात प्रकरण : बीडच्या मित्राने पीडितांचा व्हिडीओ शेअर केला, अन् अहिल्यानगरचे दोघं अडकले; SIT कडून अटक
Ashok Kharat Case : भोंदू बाबा अशोक खरात प्रकरणातील पीडित महिलांचे अश्लील व्हिडिओ सोशल मीडियावर प्रसारित केल्याप्रकरणी पोलिसांनी दोघांना अटक केली असून एकाचा शोध सुरू आहे. अशा प्रकारचे व्हिडिओ शेअर करणाऱ्यांवर आणि ग्रुप ॲडमिनवर कठोर कायदेशीर कारवाई करण्याचा इशारा प्रशासनाने दिला आहे.
ADVERTISEMENT
बातम्या हायलाइट
अशोक खरात प्रकरण : चुकूनही पीडितांचे व्हिडीओ शेअर करु नका
दोघांना SIT कडून अटक; WhatsApp ग्रुप आला अंगलट
Ashok Kharat Case : नाशिकमधील भोंदू बाबा अशोक खरात याच्या विरोधात दाखल असलेल्या गंभीर गुन्ह्यातील पीडित महिलांचे अश्लील व्हिडिओ सोशल मीडियावर व्हायरल करणे तिघांच्या चांगलेच अंगलट आले आहे. या प्रकरणी अहिल्यानगर जिल्ह्यातील कोपरगाव शहर पोलीस ठाण्यात गुन्हा दाखल करण्यात आला असून, आतापर्यंत दोन आरोपींना अटक करण्यात आली आहे. सरकारवाडा पोलीस ठाण्यात नोंद असलेल्या या मूळ गुन्ह्याचा तपास विशेष तपास पथकाकडून (SIT) सुरू असतानाच, पीडितांची बदनामी करणाऱ्या या नवीन प्रकारामुळे पोलीस यंत्रणा सतर्क झाली आहे.
SIT कडून दोघांना अटक, एकाचा शोध सुरु
कोपरगाव येथील 'BMW' नावाच्या व्हॉट्सॲप ग्रुपवर 25 मार्च 2026 रोजी राहुल गंगाधर शिंदे याने पीडित महिलांचे अश्लील व्हिडिओ प्रसारित केले होते. पोलिसांनी या प्रकरणाचा तांत्रिक तपास केला असता, हे व्हिडिओ त्याला योगेश पंढरीनाथ आढाव याने पाठविल्याचे समोर आले. तपासाची चक्रे पुढे फिरवल्यावर बीड जिल्ह्यातील माजलगाव येथील संदिप गर्जे याने हे व्हिडिओ योगेशला दिल्याचे स्पष्ट झाले. या साखळीचा छडा लावत पोलिसांनी राहुल शिंदे आणि योगेश आढाव या दोघांना बेड्या ठोकल्या असून, संदिप गर्जे याचा शोध युद्धपातळीवर सुरू आहे.
हेही वाचा : कल्याण : सायकलिंग करत असलेल्या बिझनेसमनला चिरडलं, अल्पवयीन मुलाची बेदरकार कार ड्रायव्हिंग; पाहा VIDEO
या तिन्ही आरोपींविरुद्ध भारतीय न्याय संहिता (BNS) कलम 294 (2), 3 (5) आणि माहिती तंत्रज्ञान कायदा 2000 च्या कलम 67 (अ) नुसार गुन्हा दाखल करण्यात आला आहे. हे संपूर्ण प्रकरण अत्यंत संवेदनशील असून यामध्ये अनेक महिला पीडित असण्याची शक्यता पोलिसांनी वर्तवली आहे. पीडित महिलांची ओळख उघड होऊ नये आणि त्यांच्या गोपनीयतेचा भंग होऊ नये, यादृष्टीने पोलीस प्रशासन अत्यंत संवेदनशीलतेने आणि गुप्तता पाळून या प्रकरणाचा पुढील तपास करत आहे.
