सांगली हादरली, पलूसमध्ये शिक्षण संस्थेच्या संचालकाची निर्घृण हत्या; मंदिरात दर्शनासाठी जात असताना संपवलं
Sangli Palus Murder News : सांगली जिल्ह्यातील पलूस शहरात एका नामांकित शिक्षण संस्थेच्या संचालकाची धारदार शस्त्राने हत्या झाल्याची धक्कादायक घटना समोर आली आहे. संजय प्रभाकर परांजपे असे मृताचे नाव असून, अज्ञात हल्लेखोरांनी राहत्या घराजवळच हा हल्ला केल्याने संपूर्ण जिल्ह्यात खळबळ उडाली आहे.
ADVERTISEMENT
बातम्या हायलाइट
सांगली हादरली, पलूसमध्ये शिक्षण संस्थेच्या संचालकाची निर्घृण हत्या
मंदिरात दर्शनासाठी जात असताना संपवलं
Sangli Palus Murder News : सांगली जिल्ह्यातील पलूस शहरात गुरुवारी रात्री एका ज्येष्ठ शिक्षण संस्था संचालकाचा रक्ताच्या थारोळ्यात मृतदेह आढळल्याने परिसरात मोठी खळबळ उडाली आहे. पंडित विष्णू दिगंबर शिक्षण संस्थेचे विद्यमान संचालक संजय प्रभाकर परांजपे यांची अज्ञातांनी धारदार शस्त्राने वार करून हत्या केली. परांजपे हे पलूसमधील कुंडल वेस भागातील एका अपार्टमेंटमध्ये आपल्या कुटुंबासह वास्तव्यास होते. ही घटना रात्रीच्या सुमारास घडली असून, हल्लेखोरांनी अतिशय क्रूरपणे त्यांच्यावर वार केले आणि घटनास्थळावरून पळ काढला. या घटनेची माहिती मिळताच पलूस पोलिसांनी तातडीने धाव घेत तपासचक्र फिरवण्यास सुरुवात केली आहे.
परांजपे यांच्यावर पाळत ठेवूनच हा हल्ला केल्याचा संशय
मिळालेल्या प्राथमिक माहितीनुसार, संजय परांजपे हे घटनेच्या वेळी आपल्या कुटुंबासमवेत घरीच बसले होते. काही वेळानंतर ते अचानक उठले आणि इमारतीच्या खाली असलेल्या मंदिरात दर्शनासाठी गेले. मात्र, बराच वेळ उलटूनही ते परत न आल्याने कुटुंबातील सदस्यांना काळजी वाटू लागली. त्यांनी त्यांचा शोध घेण्यासाठी इमारतीच्या खाली धाव घेतली असता, परांजपे यांचा मृतदेह रक्ताच्या थारोळ्यात पडलेला त्यांना दिसून आला. हे भीषण दृश्य पाहताच कुटुंबीयांनी एकच टाहो फोडला. हल्लेखोरांनी परांजपे यांच्यावर पाळत ठेवूनच हा हल्ला केल्याचा संशय व्यक्त केला जात असून, त्यांनी मंदिरातून परतताना किंवा तिथे जात असताना गाठून हे कृत्य केले असावे, असा प्राथमिक अंदाज पोलिसांनी वर्तवला आहे.
पोलीस तपास आणि शहरात दहशतीचे वातावरण
घटनेची माहिती वाऱ्यासारखी शहरात पसरताच कुंडल वेस परिसरात मोठी गर्दी जमा झाली होती. पलूस पोलिसांनी तातडीने घटनास्थळी पोहोचून परिसराची नाकाबंदी केली. रात्री उशिरापर्यंत पोलिसांकडून घटनेचा पंचनामा आणि पुरावे गोळा करण्याचे काम सुरू होते. संजय परांजपे हे शिक्षण क्षेत्रातील एक मान्यवर व्यक्तिमत्व असल्याने त्यांच्या हत्येच्या बातमीने शैक्षणिक क्षेत्रातही शोककळा पसरली आहे. या घटनेमुळे स्थानिक नागरिकांमध्ये भीतीचे वातावरण असून गुन्हेगारांना तात्काळ अटक करण्याची मागणी होत आहे.
परांजपे यांच्यासारख्या प्रतिष्ठित व्यक्तीची अशा प्रकारे हत्या झाल्याने सांगली जिल्ह्यातील कायदा व सुव्यवस्थेचा प्रश्न पुन्हा एकदा ऐरणीवर आला आहे. पोलिसांनी संशयितांची धरपकड करण्यासाठी विशेष पथके तैनात केली असून, लवकरच या गुन्ह्याचा छडा लागेल असा विश्वास व्यक्त केला आहे. मात्र, या घटनेमुळे परांजपे कुटुंबावर दुःखाचा डोंगर कोसळला असून संपूर्ण पलूस शहर या घटनेने सुन्न झाले आहे.
हे वाचलं का?
