गडगंज श्रीमंत असलेल्या वृद्धाला एकटेपणा जाणवू लागला, गर्लफ्रेंडला शोधून भेटण्यास बोलावलं अन् भयंकर घडलं
Crime News : 69 वर्षीय वृद्धाला डेटिंग ॲपवरून हनीट्रॅपमध्ये अडकवून लुटणाऱ्या टोळीचा पोलिसांनी पर्दाफाश केला असून चार आरोपींना अटक केली आहे. आरोपींनी मारहाण करून दागिने आणि ऑनलाइन 65 हजार रुपये लुटले होते, ज्यातील काही रक्कम आणि दागिने हस्तगत करण्यात आले आहेत.
ADVERTISEMENT
बातम्या हायलाइट
गडगंज श्रीमंत असलेल्या वृद्धाला एकटेपणा जाणवू लागला
गर्लफ्रेंडला शोधून भेटण्यास बोलावलं अन् भयंकर घडलं
UP Crime News : उत्तर प्रदेशातील बिजनौर जिल्ह्यातून डिजिटल युगातील धोक्याची जाणीव करून देणारी एक धक्कादायक घटना समोर आली आहे. एका 69 वर्षीय वृद्धाच्या एकटेपणाचा फायदा घेत सराईत गुन्हेगारांनी त्यांना 'हनीट्रॅप'मध्ये अडकवले आणि नियोजनबद्ध पद्धतीने लूटमार केली. विरेंद्र भटनागर असे या पीडित वृद्धाचे नाव असून त्यांची ओळख एका डेटिंग ॲपवर 'बेबी' नावाच्या प्रोफाईलशी झाली होती. प्रत्यक्षात ही प्रोफाईल समीर नावाचा तरुण चालवत होता आणि वृद्धाचा विश्वास संपादन करण्यासाठी टोळीतील मुलींशी त्यांचे बोलणेही करून दिले जात असे. जेव्हा भटनागर पूर्णपणे या जाळ्यात अडकले, तेव्हा त्यांना भेटण्याच्या बहाण्याने एका निर्जन ठिकाणी बोलावण्यात आले आणि तिथूनच या लूटमारीच्या प्रकाराला सुरुवात झाली.
फार्म हाऊसवर बेदम मारहाण आणि दागिने-पैशांची लूट
ठरलेल्या योजनेनुसार 17 एप्रिल 2026 रोजी विरेंद्र भटनागर भेटायला पोहोचले असता, मोनिश नावाच्या आरोपीने त्यांना आपल्या दुचाकीवर बसवून एका सुनसान फार्म हाऊसवर नेले. तिथे आधीच दबा धरून बसलेल्या समीर, आकील, अनस, फरहान आणि फरदीन यांनी वृद्धाला चारी बाजूंनी घेरले. या नराधमांनी केवळ त्यांना घेरले नाही, तर त्यांच्याशी अत्यंत क्रूरपणे मारहाण केली आणि जीवे मारण्याची धमकी देऊन दहशत निर्माण केली. या धाकदपटशाच्या जोरावर आरोपींनी त्यांच्या हातातील सोन्याची अंगठी आणि गळ्यातील साखळी ओरबाडून घेतली. गुन्हेगारांची भूक एवढ्यावरच थांबली नाही; त्यांनी भटनागर यांचा मोबाईल हिसकावून घेत त्यांच्याकडून जबरदस्तीने ‘फोन-पे’चा पासवर्ड मिळवला आणि खात्यातून 65 हजार रुपये वेगवेगळ्या खात्यांमध्ये ट्रान्सफर करून घेतले.
पोलिसांची धडक कारवाई आणि आरोपींची कबुली
या घटनेनंतर दुसऱ्या दिवशी, 18 एप्रिल रोजी पीडित वृद्धाचा मुलगा विशाल भटनागर याने पोलीस ठाण्यात तक्रार दाखल केली. बिजनौर पोलिसांनी या प्रकरणाचे गांभीर्य लक्षात घेऊन भारतीय न्याय संहितेच्या कलम 309 (6) नुसार गुन्हा दाखल केला आणि तातडीने तपासाची चक्रे फिरवली. सर्व्हिलन्स आणि तांत्रिक पुराव्यांच्या मदतीने पोलिसांनी आरोपींचे लोकेशन शोधून काढले आणि मोनिश, समीर, आकील व अनस या चार आरोपींना बेड्या ठोकल्या. अटक करण्यात आलेल्या आरोपींकडून लुटलेली सोन्याची अंगठी, साखळी आणि 42,380 रुपयांची रोकड हस्तगत करण्यात आली आहे. या कारवाईमुळे परिसरात पोलिसांच्या तत्परतेचे कौतुक होत असून, घटनेत वापरलेले मोबाईल आणि इतर महत्त्वाचे पुरावेही जप्त करण्यात आले आहेत.
पोलीस चौकशीत मुख्य आरोपी समीरने कबूल केले की, श्रीमंत वृद्धांना लक्ष्य करण्यासाठी त्यांनी हे हनीट्रॅपचे जाळे विणले होते. लुटलेली रक्कम सर्व साथीदारांनी आपापसात वाटून घेतली होती. सध्या या प्रकरणातील फरहान आणि फरदीन हे दोन आरोपी फरार असून पोलीस त्यांचा शोध घेण्यासाठी छापेमारी करत आहेत. ही घटना सोशल मीडिया आणि डेटिंग ॲप्स वापरणाऱ्यांसाठी एक गंभीर इशारा आहे, कारण गुन्हेगार मानवी भावनांचा गैरफायदा घेऊन लूटमारीचे जाळे पसरवत आहेत. बिजनौर पोलिसांनी अशा ॲप्सचा वापर करताना नागरिकांना अत्यंत सावध राहण्याचे आवाहन केले आहे. कोणत्याही अनोळखी व्यक्तीवर डिजिटल प्लॅटफॉर्मवर विश्वास ठेवणे जीवावर बेतू शकते, हे या घटनेतून पुन्हा एकदा स्पष्ट झाले आहे.
