तीन मुलांची आई पण मैत्रिणीवर जीव जडला, पोलिसांसमोरही ठाम राहिली अन् घेतला मोठा निर्णय

मैत्रिणीवर प्रेम करत असून तिच्यासोबतच राहण्याची इच्छा

पत्नी अचानक घरातून निघून गेल्यानंतर पतीने महाराजपूर पोलीस ठाण्यात तिच्या बेपत्ता होण्याची तक्रार दाखल केली. त्यानंतर पोलिसांनी महिलेच्या मोबाइलचे सर्व्हिलन्स आणि कॉल डिटेल तपासण्यास सुरुवात केली. तपासादरम्यान दिल्लीतील एका क्रमांकाचा शोध लागला. त्यानंतर पोलिसांनी महिलेच्या मोबाइलच्या लोकेशनच्या आधारे तिचा शोध घेतला. पोलिसांनी महिला आणि तिच्या मैत्रिणीला ताब्यात घेऊन महाराजपूर पोलीस ठाण्यात आणले. एसीपी आशुतोष सिंह यांनी महिलेची चौकशी केली असता, तिने आपण मैत्रिणीवर प्रेम करत असून तिच्यासोबतच राहण्याची इच्छा असल्याचे स्पष्ट सांगितले.

महिलेचे पती, मुले आणि आई-वडील पोलीस ठाण्यात पोहोचले. यावेळी मुलांनी आईला घरी परतण्याची विनंती केली. मुलांनी रडत आईकडे घरी येण्याची मागणी केली, मात्र महिलेने मुलांबद्दल आपल्याला प्रेम नसल्याचे सांगितले. तसेच मुलांनी वडिलांसोबत राहावे, असे तिने स्पष्ट केले. महिलेने मैत्रिणीसोबतच राहण्याचा निर्णय घेतल्याचे पोलिसांना सांगितले. ती सज्ञान असल्याने आणि स्वतःच्या इच्छेनुसार कुठे राहायचे याचा निर्णय घेण्याचा कायदेशीर अधिकार असल्याने पोलिसांनी तिला मैत्रिणीसोबत जाण्याची परवानगी दिली. यासाठी सर्वोच्च न्यायालयाच्या मार्गदर्शक सूचना आणि सज्ञान व्यक्तीच्या इच्छेनुसार राहण्याच्या अधिकाराचा आधार घेण्यात आला.

कानपूरचे वरिष्ठ वकील तत्वेश अग्रवाल यांनी या प्रकरणातील कायदेशीर बाजू स्पष्ट केली. त्यांच्या माहितीनुसार, कायद्यानुसार सज्ञान महिलेला स्वतःच्या इच्छेनुसार राहण्याचा अधिकार आहे. मात्र, हिंदू अॅडॉप्शन अँड मेंटेनन्स अॅक्टच्या कलम २० नुसार मुलांना आईकडून पालनपोषण मिळण्याचा कायदेशीर अधिकार आहे. त्यामुळे भविष्यात मुलांनी न्यायालयात यासंदर्भात दाद मागितल्यास, त्यांच्या पालनपोषणासाठी आणि खर्चासाठी आईला जबाबदार धरले जाऊ शकते. दरम्यान, महाराजपूर पोलिसांनी महिलेची इच्छा आणि तिच्या कायदेशीर अधिकाराचा विचार करून तिला तिच्या मैत्रिणीसोबत जाण्याची परवानगी दिली.