नागपूर : कोेडवर्डने प्रवेश अन् आतमध्ये मुली..., स्पा सेंटरच्या आडून सेक्स रॅकेट

पोलिसांच्या माहितीनुसार, शनिवारी सायंकाळी सुमारे पाच वाजण्याच्या सुमारास गुन्हे शाखेच्या सामाजिक सुरक्षा विभागाने आणि मानवी तस्करीविरोधी पथकाने ग्रेप्स स्पा अँड सॅलूनवर छापा टाकला. या ठिकाणी कथित गैरप्रकार सुरू असल्याची माहिती मिळाल्यानंतर पोलिसांनी कारवाईचे नियोजन केले होते. त्यासाठी दोन पंच आणि एका बनावट ग्राहकाची मदत घेण्यात आली. त्यानंतर पोलिसांच्या पथकाने स्पामध्ये प्रवेश करून तपासणी केली. या कारवाईदरम्यान तीन महिलांची सुटका करण्यात आली. स्पामध्ये नेमक्या कोणत्या पद्धतीने ग्राहकांना प्रवेश दिला जात होता आणि महिलांना या कथित प्रकारात कसे सहभागी केले जात होते, याची माहिती पोलीस गोळा करत आहेत.

हेही वाचा : सुनेत्रा पवार राज्याच्या अर्थमंत्री होणार? राष्ट्रवादीची बैठक अन् फडणवीसांच्या भेटीगाठी; काय घडतंय?

पोलिसांनी दिलेल्या माहितीनुसार, स्पामध्ये येणाऱ्या ग्राहकांना एक विशिष्ट सांकेतिक शब्द दिला जात होता. या शब्दाच्या आधारे ग्राहकांना प्रवेश मिळत असल्याचा आरोप आहे. महिलांना अधिक पैसे कमावण्याचे आमिष दाखवले जात होते आणि त्यानंतर ग्राहकांना बोलावून त्यांच्याकडून देहव्यापार करून घेतला जात असल्याचा संशय पोलिसांनी व्यक्त केला आहे. या प्रकरणात हार्दिक नावाच्या 22 वर्षीय तरुणाला पकडण्यात आले आहे. मात्र, स्पाचा मालक गुंजन राजेश आसरे आणि व्यवस्थापक अन्नु जमीर हे अद्याप पोलिसांच्या हाती लागलेले नाहीत. त्यांचा शोध घेण्यासाठी पोलिसांकडून प्रयत्न सुरू आहेत.

या प्रकरणी नागपूरमधील सदर पोलीस ठाण्यात गुन्हा दाखल करण्यात आला आहे. स्पा अँड सॅलूनच्या आड सुरू असल्याचा आरोप असलेल्या या कथित प्रकारात आणखी कोणाचा सहभाग आहे, याचा तपास पोलीस करत आहेत. ग्राहकांना बोलावण्यासाठी कोणती पद्धत वापरली जात होती आणि या प्रकरणाचे आणखी काही धागेदोरे आहेत का, याचीही चौकशी सुरू आहे. छापेमारीनंतर तीन महिलांची सुटका करण्यात आली असून, एका तरुणाला पकडण्यात आले आहे. स्पाचा मालक आणि व्यवस्थापक यांचा शोध सुरू असून, या प्रकरणातील पुढील तपासातून अधिक माहिती समोर येण्याची शक्यता आहे.