शिंदेंच्या शिवसेना नेत्याकडे सापडला गांजा, कोकेनचा मोठा साठा, पोलिसांनी अचानक टाकली धाड अन्…
वेंगुर्ल्यातील शिरोडा देऊळवाडी येथे पोलिसांनी मोठी कारवाई केली. 710 ग्रॅम अंमली पदार्थ जप्त करण्यात आले असून शिंदे गटाच्या शिवसेनेचे उपजिल्हाप्रमुख सिद्देश परब यांना संशयित म्हणून ताब्यात घेण्यात आले आहे.
ADVERTISEMENT
भरत केसरकर, वेंगुर्ला: सिंधुदुर्ग जिल्ह्यात अंमली पदार्थांविरोधात पोलिसांनी मोठी कारवाई केली आहे. वेंगुर्ला तालुक्यातील शिरोडा देऊळवाडी परिसरात पोलिसांनी धडक कारवाई करत अंमली पदार्थांचा साठा जप्त केला. या कारवाईत गांजा आणि कोकेनचा समावेश असल्याची माहिती असून, एकूण 710 ग्रॅम अंमली पदार्थ जप्त करण्यात आल्याचे सांगण्यात येत आहे.
या प्रकरणी शिंदे गटाच्या शिवसेनेचे उपजिल्हाप्रमुख सिद्देश परब यांना पोलिसांनी संशयित म्हणून ताब्यात घेतले आहे. परब यांच्या घराच्या बाहेरील पडवीत पोलिसांना अंमली पदार्थांनी भरलेली बॅग आढळून आल्याची माहिती आहे. त्यानंतर पोलिसांनी ही बॅग ताब्यात घेत पुढील तपास सुरू केला आहे.
घराबाहेरील पडवीत सापडली अंमली पदार्थांची बॅग
पोलिसांच्या कारवाईदरम्यान सिद्देश परब यांच्या घराच्या बाहेरील पडवीत एक बॅग आढळून आली. या बॅगेमध्ये गांजा आणि कोकेन असल्याची प्राथमिक माहिती समोर आली आहे. या अंमली पदार्थांचे एकूण वजन 710 ग्रॅम असल्याचे सांगण्यात येत आहे.
या साठ्यामागे नेमका कोणाचा संबंध आहे, अंमली पदार्थ कुठून आणण्यात आले आणि त्याचा पुढे कुठे पुरवठा केला जाणार होता, याचा तपास आता पोलिसांकडून केला जात आहे.