‘खुशीला मारलं, आता तिच्याजवळ जातोय’, त्याने फेसबुक लाईव्ह सुरू असतानाच…

फेसबुकवर लाईव्ह येऊन सगळा प्रकार सांगितल्यानंतर अंकित कुमारने 13 मे रोजी दुपारी स्वतःवर गोळी झाडून आत्महत्या केली. एक दिवसापूर्वी त्याने रांचीमध्ये निवेदिता नावाच्या विद्यार्थिनीची गोळ्या घालून हत्या केली होती.

अंकितने शनिवारी कोकर यांच्या अयोध्यापुरी येथील घरात स्वत:वर गोळी झाडली. त्याचा जागीच मृत्यू झाला. ज्या पिस्तुलाने त्याने निवेदिता उर्फ खुशी हिच्यावर गोळी झाडली होती, त्याच पिस्तुलाने त्याने स्वतःवरही गोळी झाडली.

पोलिसांकडून सुरू होता शोध

दुसरीकडे, त्याला पकडण्यासाठी बिहारमधील नवादासह अनेक ठिकाणी पोलीस छापे टाकत होते. अंकित कुमार हा अरगोडा येथे भाड्याच्या घरात राहत होता. अंकित आणि निवेदिता यांचे बरेच दिवस प्रेमसंबंध होते. निवेदिता दोन महिने अंकितशी बोलत नव्हती. याचा राग येऊन अंकितने तिलाच संपवलं.

निवेदिता शुक्रवारी सायंकाळी नाश्ता करण्यासाठी बाहेर गेली…

निवेदिता रांचीच्या अरगोडा पोलीस स्टेशन हद्दीतील पटेल चौकाजवळ एका वसतिगृहात राहत होती. शुक्रवारी संध्याकाळी ती तिची मैत्रीण सृष्टी कुमारीसोबत हरमू मार्केटमध्ये नाश्ता करण्यासाठी गेली असताना अंकितने तिच्यावर तीन वेळा गोळ्या झाडल्या होत्या. संध्याकाळी 6.15 वाजता नाश्ता करून ती वसतिगृहात परतत असतानाच ही घटना घडली होती.

हेही वाचा >> बॉयफ्रेंडकडून आईचं लैगिक शोषण, गर्लफ्रेंडचा पोलिसांसमोर धक्कादायक खुलासा

ती वसतिगृहापासून 50 मीटर अंतरावर पोहोचलीच होती, तेव्हा आरोपी अंकित कुमार तिच्यापर्यंत पोहोचला. त्याने निवेदिताला विचारले तू माझ्याशी का बोलत नाहीस? त्याच्या या प्रश्नाला निवेदिताने काहीच उत्तर दिलं नाही. दरम्यान, अंकितने निवेदितावर तीन गोळ्या झाडल्या. एक गोळी निवेदिताच्या डोळ्यात, तर दोन गोळ्या छातीत लागल्या. त्याचवेळी तिची मैत्रिण सृष्टीही गोळी लागल्याने जखमी होऊन रस्त्यावर पडली.

पोलिसांनी रुग्णालयात नेले रुग्णालयात, उपचारादरम्यान झाला मृत्यू

गोळीबाराचा आवाज ऐकून आसपासच्या लोकांनी गुन्हेगारांचा पाठलाग केला. मात्र, भरधाव वेगात दुचाकी चालवून गुन्हेगारांनी तेथून पळ काढला. निवेदिताला गोळ्या लागल्याची माहिती स्थानिक लोकांनी तातडीने अरगोडा पोलीस ठाण्यात दिली. स्टेशन प्रभारी विनोद कुमार तातडीने घटनास्थळी पोहोचले आणि जखमी मुलीला तातडीने रांचीच्या रिम्स रुग्णालयात नेण्यात आले.

हेही वाचा >> आर्यन खान प्रकरणात 25 कोटी खंडणीची मागणी, समीर वानखेडेंच्या घरात काय सापडलं?

मात्र, रुग्णालयात नेल्यानंतर डॉक्टरांनी निवेदिताला मृत घोषित केले. घटनेची माहिती मिळताच शहर एसपी शुभांशु जैन हेही घटनास्थळी पोहोचले. त्यांनी सांगितले की, मुलीच्या कुटुंबीयांना घटनेची माहिती देण्यात आली आहे. निवेदिता असे या मुलीचे नाव असून तिचे वय 20 वर्षे आहे. ती बिहारच्या नवादा जिल्ह्यातील रहिवासी असून पटेल चौकातील वसतिगृहात शिकत होती. शनिवारी ती आपल्या घरी परतणार होती.