Shiv Sena: CM शिंदेंची मोठी खेळी, मुंबईतील 'या' बड्या नेत्याचं तिकीट कापणार?
Lok Sabha Election 2024 Govinda: बॉलिवूड अभिनेते गोविंदा यांना शिवसेनेत प्रवेश देत एकनाथ शिंदे यांनी एक नवा डाव खेळला आहे. पण यामुळे गजानन किर्तीकर यांची उमेदवारी धोक्यात येण्याची शक्यता आहे.
ADVERTISEMENT
बातम्या हायलाइट
एकनाथ शिंदेंची एक मोठी खेळी
उत्तर-पश्चिम मतदारसंघातून गोविंदाला तिकीट मिळण्याची शक्यता
गजानन किर्तीकरांचा पत्ता कट होण्याची शक्यता
Govinda in Shiv Sena: मुंबई: लोकसभा निवडणूक 2024 च्या पार्श्वभूमीवर जागा वाटप सुरू झालं आहे. पण महायुतीत यावरून बरीच रस्सीखेच सुरू आहे. अशातच शिवसेनेचे (शिंदे गट) मुख्य नेते आणि मुख्यमंत्री एकनाथ शिंदे यांनी मुंबईतील उत्तर-पश्चिम लोकसभा मतदारसंघासाठी एक मोठी खेळी खेळली आहे. ही खेळी म्हणजे काँग्रेसचे माजी खासदार आणि अभिनेते गोविंदा यांना शिवसेनेत प्रवेश दिला आहे. पण याचवेळी त्या मतदारसंघातील विद्यमान खासदार गजानन किर्तीकर यांची मात्र चिंता वाढली आहे. (lok sabha election 2024 cm eknath shinde big move likely to reject candidature of gajanan kirtikar big leader of shiv sena in mumbai)
गजानन किर्तीकरांचं तिकीट कापणार?
अभिनेता गोविंदा हे मुंबई उत्तर-पश्चिम मतदारसंघातून लोकसभा निवडणूक लढवू शकतात. आज (28 मार्च) गोविंदा यांनी मुख्यमंत्री एकनाथ शिंदे यांची भेट घेत शिवसेना पक्षात प्रवेश केला. मिळालेल्या माहितीनुसार, गोविंदा यांना शिवसेनेकडून (शिंदे गट) उत्तर-पश्चिममधून तिकीट मिळू शकतं. या जागेवरून उद्धव ठाकरे (शिवसेना गट) यांनी अमोल कीर्तिकर यांना उमेदवारी दिली आहे. सध्या या मतदारसंघात गजानन किर्तीकर हे खासदार आहेत. जे सध्या शिंदे गटात आहेत. पण आता गोविंदा यांच्या शिवसेनेतील एंट्रीने किर्तीकरांचं तिकीट कापलं जाणार असल्याची जोरदार चर्चा राजकीय वर्तुळात सुरू आहे.
दरम्यान, याआधी बुधवारी गोविंदा यांनी शिवसेनेचे (शिंदे गट) प्रवक्ते आणि माजी आमदार कृष्णा हेगडे यांचीही भेट घेतली होती. तेव्हापासून गोविंदा हे पुन्हा एकदा राजकारणात येणार असल्याची चर्चा सुरू होती. आता, गोविंदा यांनी अधिकृतपणे शिवसेनेच्या शिंदे गटात प्रवेश केल्याने त्यांना कोणत्या मतदारसंघातून तिकीट मिळणार याबाबत चर्चेला उधाण आलं आहे.
सूत्रांच्या माहितीनुसार, शिवसेना (शिंदे गट) हे गोविंदा यांना उत्तर-पश्चिम मतदारसंघातून निवडणुकीच्या रिंगणात उतरवू शकतात. ज्यामुळे गजानन किर्तीकर यांना मोठा फटका बसू शकतो. तर दुसरीकडे शिवसेना (ठाकरे गट) यांनी आधीच गजानन किर्तीकर यांचे पुत्र अमोल किर्तीकर यांना तिकीट देऊन नवा डाव खेळला आहे. अशावेळी शिंदे हे गजानन किर्तीकर यांना तिकीट देणार की गोविंदांना मैदानात उतरवणार हे पाहणं महत्त्वाचं ठरणार आहे.
हे वाचलं का?
