Lok Sabha Election 2024: शिवसेनेने (शिंदे गट) नाशिकची जागा गमावली?, गोडसेंचं करिअर पणाला..

लोकसभा निवडणुकांची घोषणा झाल्यापासून सर्वाच पक्षांनी आपआपल्या जागांवरील उमेदवारांची यादी जाहीर केली. पण महायुतीने अद्यापही नाशिकचा उमेदवार जाहीर केलेला नाही. त्यातच येथील दोन टर्मचे खासदार असलेले हेमंत गोडसे हे मागील काही दिवस मुंबईतच तळ ठोकून होते. पण म्हणावा तसा प्रतिसाद त्यांना मिळालेला नाही. त्यामुळे कोणतीही घोषणा होण्याआधीच गोडसेंनी स्वत:च्या प्रचाराला सुरुवात केली आहे. 

दुसरीकडे नाशिकमध्ये आपली उमेदवारी कशी ठरलीय याबाबत स्वत: छगन भुजबळ यांनीच माध्यमांना माहिती दिली आहे.

पाहा छगन भुजबळ नेमकं काय म्हणाले:

'जी चर्चा दिल्लीमध्ये झाली तिथल्या वरिष्ठ नेत्यांसोबत सगळ्यांची आणि महाराष्ट्रातील वेगवेगळ्या जागांबाबत कोण उमेदवार, कोणती जागा कोणाला द्यायची या संदर्भातील जेव्हा चर्चा झाली तेव्हा अचानक त्यावेळी माझं नाव पुढे आलं. सांगितलं की, भुजबळांनी नाशिकमधून उभं राहावं. याची काही कल्पना आम्हाला सुद्धा नव्हती.' 

'होळीच्या दिवशी आम्ही मुंबईवरून नाशिकला यायला निघालो. तेव्हा अर्ध्या वाटेतूनच आम्ही परत गेलो. तेव्हा त्यांनी सांगितलं की, असं.. असं.. ठरलं आहे आणि ते वरिष्ठ पातळीवर ठरलं आहे. तर मी म्हटलं मला एक दिवस विचार करू द्या. उद्या सांगतो.'

'दुसऱ्या दिवशी अजितदादा, प्रफुल पटेल यांना सांगितलं.. त्याआधी मी फडणवीस यांच्याशी देखील चर्चा केली. त्यांना विचारलं की, हे खरं आहे का.. ते म्हणाले हो खरं आहे.. तिथे अशी चर्चा झाली आणि वरच्यांकडून देखील असा प्रस्ताव आला. त्यामुळे तुम्हालाच उभं राहावं लागेल.'

हे ही वाचा>> Lok Sabha Election 2024 : माढ्यात नवा ट्विस्ट; शरद पवारांचा उमेदवार ठरला?

'अचानक हे नाव पुढे आल्यानंतर मी ताबडतोब आलो आणि चर्चा केली. त्याचवेळी मीडियामध्ये ही बातमी आली आणि नाशिक पुन्हा चर्चेत आलं.' 

'आता जे काही दिसतंय.. इथले जे स्थानिक खासदार आहेत शिंदे गटाचे हेमंत गोडसे.. यांनी फार लावून धरलंय.. त्यामुळे तिथे काही चर्चा सुरू आहे.' 

'माझ्यापुरतं मी एवढंच सांगेन की, जो निर्णय ते देतील तो मला मान्य आहे. महायुतीसाठी आम्ही सर्व एकजुटीने काम करणार.. आता काय चर्चा असेल ती करावी आणि प्रश्न सोडवावा. ही जागा त्यांनी राष्ट्रवादी काँग्रेसला सोडली तर अर्थातच जे चिन्ह आहे घड्याळ.. तीच निशाणी असणार.' असं छगन भुजबळ म्हणाले. 

हेमंत गोडसेंचं राजकीय करिअर धोक्यात?

दरम्यान, महायुतीचे उमेदवार म्हणून छगन भुजबळांच्या नावाची घोषणा झाली तर त्याचा मोठा फटका हा हेमंत गोडसे यांना बसण्याची शक्यता आहे. शिंदेंनी बंड केल्यानंतर गोडसे हे त्यांच्या गटात गेले होते. त्यावेळी त्यांना अपेक्षा होती की, त्यांना पुन्हा एकदा नाशिकमधून उमेदवारी मिळेल. मात्र, अचानक राष्ट्रवादी काँग्रेसचा महायुतीत समावेश झाल्याने गोडसेंची सगळी राजकीय गणितंच बदलून गेली.

नाशिक मतदारसंघात हॅटट्रिक साधून नवा इतिहास रचण्याची संधी ही हेमंत गोडसेंकडे आहे. मात्र, अचानक ही जागा राष्ट्रवादी काँग्रेसला देण्याच्या चर्चेने गोडसेंची चिंता वाढली आहे. आधीच ठाकरेंकडून शिंदे गटात आलेल्या गोडसेंचे परतीचे मार्ग बंद झाले आहेत. त्यातच ठाकरेंनी नाशिकमध्ये राजाभाऊ वाजेंच्या नावाची घोषणा देखील करून टाकली आहे. त्यामुळे आता गोडसेंची बरीच अडचण झाली आहे.

हे ही वाचा>> Live : "सरदार आता मला किती देता, हे विचारायला जातात"

यामध्ये त्यांच्या सर्व आशा या मुख्यमंत्री एकनाथ शिंदे यांच्यावर आहेत. कारण शिंदेंनी नाशिकसाठी आग्रह धरला तरच गोडसेंना तिकीट मिळू शकतं. अन्यथा गोडसेंच्या पदरी निराशा येण्याची शक्यता आहे. अशावेळी हेमंत गोडसेंकडे केवळ अपक्ष म्हणून निवडणूक लढवण्याचा एकमेव पर्याय उरतो. पण त्याता ते कितपत यशस्वी होतील हे पाहणं सर्वात महत्त्वाचं आहे.