शूटींग करायचे असेल तर हे नियम पाळावेच लागणार, मुख्यमंत्री उद्धव ठाकरेंनी निर्मात्यांच्या बैठकीत दिले सक्त आदेश

महाराष्ट्रात कोरोना रूग्णांचा आकडा वाढताना दिसतोय. बॉलिवूड तसंच मराठी कलाकार देखील कोरोनाच्या विळख्यात अडकलेत. दरम्यान याच पार्श्वभूमीवर मुख्यमंत्री उद्धव ठाकरे यांनी रविवारी कोविडच्या वाढत्या संसर्गाच्या पार्श्वभूमीवर चित्रपट आणि टिव्ही मालिका निर्माते यांच्याशी व्हिडीयो कॉलिंगद्वारे चर्चा केली. यामध्ये सरकार घेत असलेल्या निर्णयांच्या अनुषंगाने यापुढे शूटींग करायचे असेल तर काही कडक नियम पाळावे लागतील तरच शूटींगला परवानगी देऊ असे सक्त आदेश मुख्यमंत्री उध्दव ठाकरेंनी व्हिडिओ कॉलिंगमध्ये असलेल्या सर्व निर्माते, सिनेसंघटनांचे पदाधिकारी आणि कलाकारांना दिले आहेत. शूटींगस्थळी सरकारने घालून दिलेले नियम जर पाळत नसल्यास आणि तसे निर्दशनास आल्यास तात्काळ ते शूटींग थांबवण्यात येईल असा इशाराही या बैठकीत निर्मात्यांना देण्यात आला आहे.