CM Eknath Shinde : "युती धर्माचं पालन होत नाहीये..."; एकनाथ शिंदेंकडून दिल्लीत भाजप नेत्यांची तक्रार?

राज्यात विधानसभा निवडणुकांच्या तोंडावर मोठ्या घडामोडी घडताना दिसत आहेत. त्यातच आता मुख्यमंत्री एकनाथ शिंदे यांनी भारतीय जनता पक्षाच्या हायकमांडकडे एक तक्रार केल्याची चर्चा सध्या राजकीय वर्तुळात सुरू आहे. महाराष्ट्रातील भाजप नेते युती धर्माचे पालन करत नसल्याचं त्यांनी या तक्रारीत म्हटल्याचं समजतंय. एकनाथ शिंदेंनी राज ठाकरेंचे पुत्र अमित ठाकरे यांच्यासाठी दादर-माहिमची जागा सोडावी, अशी मागणी भाजप नेत्यांनी सुरू केली होती. यावरुन बऱ्याच दिवसांपासून गोंधळ सुरू होता. एकनाथ शिंदे यांनी दादर-माहिम मतदारसंघातून आपला उमेदवार उभा केला असून, याच मतदारसंघात मनसे अध्यक्ष राज ठाकरे यांनी त्यांचा मुलगा अमित ठाकरे यांना उमेदवारी दिली आहे. त्यामुळे महायुतीसमोर मोठा पेच निर्माण झाला होता. राज ठाकरे हे गेल्या अनेक दिवसांपासून महायुतीच्या नेत्यांच्या जवळ होते, त्यामुळे अमित ठाकरेंसाठी काही तडजोडी होणार का? यावर सर्वांचं लक्ष होतं.