Vidhan Sabha Election 2024: शिवसेना शिंदे गटात राजकीय पिंगा, माजी नगरसेवक म्हणाले मलाच...

कल्याण शहराला मी काहीतरी देणं आहे या कल्याण शहराने आम्हाला सगळं काही दिल नाव दिलं संपत्ती दिली घर दिल परिवार दिला चांगले मित्र दिले सगळेच दिले आणि त्या भावनेतून या कल्याण शहराचा विकास मुंबईला ठाण्याच्या धरतीवर व्हावा म्हणून मी कल्याण पश्चिम विधानसभा मतदारसंघातून आपण निवडणूक लढवण्यास इच्छुक आहे, अशी माहिती केडीएमसीचे माजी सभागृह नेते श्रेयस समेळ यांनी व्यक्त केली आहे. यासंदर्भात आयोजित पत्रकार परिषदेत बोलताना त्यांनी ही माहिती दिली.

नुकत्याच झालेल्या लोकसभा निवडणुकांमध्ये शिवसेनेला लोकांनी चांगले मतदान केले आहे. कल्याण पश्चिम विधानसभा मतदारसंघ हा शिवसेनेचा बालेकिल्ला राहिलेला आहे. कल्याण शहराने आमच्या कुटुंबाला भरपूर काही दिले आहे. आपणही यापूर्वी नगरसेवक, सभागृह नेते पद आणि विविध समित्यांवर आपण काम केले असल्याने प्रशासनाची आपल्याला चांगली जाण आहे. त्या पार्श्वभूमीवर आता एक नागरिक म्हणून या शहराप्रती आपलीही बांधिलकी असून या शहराच्या प्रगतीसाठी - विकासासाठी काम करण्याची आपली इच्छा असल्याचे श्रेयस समेळ यांनी यावेळी सांगितले.

तर आपण बी. ई. मेकॅनिकलसह एमबीए मार्केटिंगची पदवी घेतली आहे. त्यामुळे सुशिक्षीत लोकांनी राजकरणात यावे, सुशिक्षीत लोकंही राजकरणात यावीत अशी लोकांची अपेक्षा आहे. आणि पक्षाचे वरिष्ठही आपल्यासारख्या उच्चशिक्षित व्यक्तीचा उमेदवारीसाठी विचार करतील असा विश्वास समेळ यांनी यावेळी व्यक्त केला.