Sharad Pawar : उद्धव ठाकरे मुख्यमंत्रिपदाचा चेहरा असतील का? पवारांनी संपवला गोंधळ

शरद पवार कोल्हापूर दौऱ्यावर होते. यावेळी त्यांनी माध्यमांशी संवाद साधला. विधानसभा निवडणुकीत मुख्यमंत्रीपदाचा चेहरा असल्याशिवाय सामोरे जाणे, हे धोक्याचे आहे, असे संजय राऊत म्हणाले आहेत. तुम्हाला तसे वाटते का? विधानसभेला एखादा मुख्यमंत्रीपदाचा चेहरा असणे गरजेचे आहे का?, असा प्रश्न शरद पवार यांना विचारण्यात आला होता. 

शरद पवारांनी काय दिले उत्तर?

उपस्थित करण्यात आलेल्या प्रश्नाला उत्तर देताना शरद पवार म्हणाले, "असे आहे की, आमची आघाडी हाच आमचा सामुदायिक चेहरा आहे. त्यात कुणीतरी व्यक्ती... याचा संबंध नाही. सामूहिक नेतृत्व हे आमचे सूत्र आहे."

हेही वाचा >> माझी लाडकी बहीण योजनेसाठी अर्ज कसा करायचा? कोणती कागदपत्रे हवी?

त्यावर उद्धव ठाकरे मुख्यमंत्रीपदाचा चेहरा असू शकतात का? असा प्रतिप्रश्न त्यांना विचारण्यात आला. उत्तर देताना पवार म्हणाले, "सांगितलं ना... सामूहिक नेतृत्व."

आमची अजून चर्चा नाही, विधानसभा निवडणुकीबद्दल पवार काय बोलले?

विधानसभा निवडणुकीची काय तयारी सुरू आहे, असा प्रश्न पवारांना विचारण्यात आला. त्यावर शरद पवार म्हणाले की, "असे आहे की, आमची अजून काही चर्चा नाही. आम्ही असं ठरवले आहे की, आमचा राष्ट्रवादी काँग्रेस, काँग्रेस पक्ष आणि उद्धव ठाकरेंच्या नेतृत्वातील पक्ष असे आम्ही तिघे जण एकत्र बसून, याचा निर्णय घेणार आहोत."

हेही वाचा >> पंकजा मुंडे कॅबिनेट मंत्री होणार? भाजपचं काय ठरलं?

"त्या बैठकीत माझी सूचना अशी राहणार आहे की, कालची जी निवडणूक झाली यामध्ये शेतकरी कामगार पक्ष, डावे कम्युनिस्ट, उजवे कम्युनिस्ट, आप या लोकांनी आम्हाला मदत केली. आम्ही तिघे बसणार असलो, तरी डाव्या विचारसरणीचे जे घटक आहेत, जे मोदी सरकारच्या विरोधी आहेत, त्यांनाही बरोबर घेण्याचा आमचा प्रयत्न राहील", अशी माहिती पवार यांनी दिली.

"आमची चर्चा झाल्यानंतर जागांचं वाटप झाल्यावर तो तो पक्ष त्यांच्या सहकाऱ्यांना, संघटनेला विश्वासात घेऊन त्यांचे निर्णय घेतील", असेही पवार यांनी यावेळी सांगितले.