महाविकास आघाडी सरकारमधील अन्न आणि नागरी पुरवठा मंत्री छगन भुजबळ यांना कोरोनाची लागण झाली आहे. भुजबळ यांनी आपल्या ट्विटर अकाऊंटवरुन ही माहिती दिली आहे. गेल्या दोन-तीन दिवसांमध्ये माझ्या संपर्कात आलेल्या प्रत्येकाने आपली कोरोना टेस्ट करुन घ्यावी असं आवाहन भुजबळ यांनी केलं आहे. आपली प्रकृती उत्तम असून काळजी करण्याचे काही कारण नाही. राज्यात कोरोनाच्या पार्श्वभूमीवर लोकांनी योग्य ती काळजी घ्यावी आणि मास्क व सॅनिटायजरचा वापर करावा असं आवाहन भुजबळ यांनी केलंय.
माझी कोरोना टेस्ट पॉझिटिव्ह आली आहे. गेल्या दोन तीन दिवसात माझ्या संपर्कात अलेल्या सर्वांनी आपली कोरोना टेस्ट करून घ्यावी.माझी प्रकृती उत्तम असून काळजी करण्याचे कारण नाही.कोरोनाच्या पार्श्वभूमीवर सर्व नागरिकांनी योग्य ती काळजी घ्यावी.मास्क,सॅनिटायझर चा नियमित वापर करा.#COVID19
— Chhagan Bhujbal (@ChhaganCBhujbal) February 22, 2021
दरम्यान छगन भुजबळांसह शरद पवारांनी रविवारी देवळाली विधानसभा मतदारसंघाच्या आमदार सरोज अहिरे यांच्या लग्नसोहळ्यात हजेरी लावली होती. यानंतर त्यांनी पत्रकार परिषदही घेतली. त्यामुळे या लग्नसोहळ्यात भुजबळांच्या संपर्कात आलेल्या प्रत्येकाला कोरोनाची चाचणी करुन घ्यावी लागणार आहे.
देवळाली विधानसभा मतदारसंघाच्या आमदार सरोज आहिरे व नाशिक मधील दंतरोगतज्ञ डॉ.प्रवीण वाघ यांच्या विवाह सोहळा आज नाशिक येथे पार पडला.राष्ट्रवादी काँग्रेस पार्टीचे राष्ट्रीय अध्यक्ष @PawarSpeaks यांच्यासमवेत वधू वरांना शुभेच्छा दिल्या व भावी उज्वल वाटचालीस सदिच्छा दिल्या. pic.twitter.com/Fy8wOXgBkp
— Chhagan Bhujbal (@ChhaganCBhujbal) February 21, 2021
गेल्या काही दिवसांमध्ये महाविकास आघाडी सरकारमधील नेते व मंत्र्यांना कोरोनाची लागण होताना दिसत आहे. सर्वात आधी जयंत पाटील यांना कोरोनाची लागण झाली. यानंतर राज्याचे गृहमंत्री अनिल देशमुखही कोरोनाग्रस्त झाले. राज्याच्या आरोग्यव्यवस्थेवर लक्ष ठेवून असणाऱ्या आरोग्यमंत्री राजेश टोपेंनाही कोरोना झाला. याव्यतिरीक्त डॉ. राजेंद्र शिंगणे, एकनाथ खडसे यांच्यानंतर छगन भुजबळ यांनाही कोरोनाची लागण झालेली आहे.
दरम्यान, मुख्यमंत्री उद्धव ठाकरे यांनीही रविवारी जनतेशी संवाद साधताना येत्या ८ ते १० दिवसांनंतर लॉकडाउन लावण्याचा निर्णय घेतला जाऊ शकतो असे संकेत दिले आहेत. अमरावती, अकोला या भागात जिल्हा प्रशासनाने लॉकडाउन जाहीर केलं आहे. मुंबईतही ५ पेक्षा जास्त रुग्ण आढळणाऱ्या सोसायट्या सील केल्या जात आहेत. या पार्श्वभूमीवर महाराष्ट्र आता पुन्हा एकदा लॉकडाउनच्या उंबरठ्यावर येऊन उभा राहिला आहे. असंच मुख्यमंत्री उद्धव ठाकरे यांच्या भाषणानंतर दिसून येत आहे.
